CEBU, Philippines - Ang Goldberry Suites, Insular Square, RDAK ug Cebu Landmasters maoy moduwa sa semifinals dihang ilang gipangparot ang tagsa-tagsa nilang karibal sa quarterfinal round sa 2013 Sacred Heart Ateneo Alumni Basketball Athletic Association (SHAABAA) niadtong Domingo didto sa Sacred Heart School-Ateneo de Cebu gym sa Brgy. Canduman, dakbayan sa Mandaue.
Ang topseed Goldberry Suites milusad og 25-9 run sa second period aron ilubong ang San Jose Bakeshop, 82-50.
Nabalikan sa iyang naandan nga duwa si Jeremy Huang ug miposte kini'g 25 puntos aron maoy mangu sa Goldberry.
Sa laing bahin, ang Insular Square mikitkit sa Alberto’s Pizza, 57-46 sa pagpangulo ni Jasper Diaz pinaagi sa iyang 19 puntos,
ang defending champion Cebu Landmasters midaog sab batok sa Gaisano Capital, 63-56. Gipangulohan kini ni Franco Te, kinsa miposa'g 23 puntos, gisundan ni Ervin Lopena nga adunay 16 puntos.
Samtang ang katapusang luna sa semis nakuha sa RDAK Transporters human nila gilubong ang Milco Fresh Eggs, 84-54.
Si Bernard Chioson maoy nangu sa Transporters nga mibahog og 12 puntos, sila si Justin Gatchalian ug Junie Alejandro mitampo'g 11 ug 10 puntos matag usa.