Lexmark, Calltek miiskor og daog sa CSCC E-League

CEBU, Philippines -  Miiskor na sab og daog ang Lexmark Stallions ug  Calltek Trojans aron magsolo sa ikaduhang dapit sa tagsa-tagsa nila ka brackets sa 9th CSCC E-League basketball tournament  niadtong Sabado didto sa  City Sports Club-Cebu gym sa Cebu Business Park.

 Ang Lexmark milubong buhi sa Teleperformance Lions sa iskor nga 70-41, samtang ang  Calltek naka-eskapo bitbit ang 54-51 nga kadaugan batok sa Kyocera Frontiers.

 Si Giovanni Villahermosa mituhog og 14 puntos ug adunay tagduha ka assists ug steals ug si Jake Pia miabuno 12 puntos alang sa Lexmark nga nagsolo sa ikaduha sa bracket B sa Southern  Conference sa ilang 3-1 nga baraha.

 Miiskor sab og double figures si Niel Tempo alang sa Lexmark nga walay kukaluoy mimakmak sa

Teleperformance human miposte og 34-24 nga bentaha sa halftime.

 Ang Lexmark nga walay katagbawan, milusad og  36-17 sa nahabiling duha ka kuwarter aron moposte og 29 puntos nga kadaugan.

 Si Frenche Bonn Petallo mitusak og 12 puntos alang sa Teleperformance nga nakatilaw sa ilang ikalimang sunod-sunod nga pilde.

 Sa laing bahin, si Mark Louise Gellez mipabuhagay og 14 puntos aron pangulohan ang Calltek nga pabilin mipuwesto sa ikaduhang dapit sa bracket A sa Northern Conference sa ilang 5-1 win-loss record.

 Si Winston Stephen Panal miiskor sab og 14 puntos, samtang si Derwin Dexter Sy mitimbre og 10 puntos alang sa Kyocera nga wala pa makatagamtam og daog sud sa upat ka duwa.

 Sa laing aksiyon,  ang MVP ug "Rookie of the Year" nga  si Sylvester Millevo  miburak og 28 puntos aron

pangulohan ang defending champion Stream Ingenyouity ngadto sa 71-58 nga kadaugan batok sa 1&1 Marauders.

 Gawas sa iyang puntos, si Millevo milangkat sab og tulo ka rebounds, tulo ka blocks ug duha ka assists alang sa maong kadaugan.

 Si Angelo Lucero mitikdol og 13 puntos ug lima ka rebounds alang sa Stream nga temporaryo karong nag-una sa bracket B sa Northern  Conference uban ang 3-1 nga baraha.

 Nabitin ang Stream sa halftime, 28-31, apan mibawos kini sa third period sa pinaagi sa ilang 21-14 run sa wala pa molusad og 22-13 nga rally aron moposte og 13 puntos nga kadaugan.

 Ang 2-2 nga 1&1 gipangulohan ni Arnel Azarcon pinaagi sa iyang 14 puntos, gisundan ni Jan Isiah Gabest nga mipabuhagay og 13 puntos. (BANAT PALARO)