NBAC buksan karon, TV 5 dili musalmot

CEBU, Philippines - Andam na ang tanan alang sa pagbukas sa laing season sa Newsmen Basketball Association of Cebu (NBAC) karong buntag diha sa Cebu Eastern College (CEC) gym, ning syudad.

Ang koponan nga musalmot mao ang Cebu Daily News-The Freeman, SunStar-Bombo Radyo, ABS-CBN, CCTN-47 ug defending champion nga GMA-7.

Sa dili pa ang opening game, usa una ka mubo nga opening ceremony ang ipahigayun diin iparada sa tagsa-tagsa ka mga koponan ang ilang mga maanyag nga muses.

Ang torneyo musunod og single round robin format diin ang top four nga koponan moabante sa semifinals. Ang championship himuong best-of-three series, samtang ang battle-for-third usa ka knockout game.

Sa laing bahin, pormal nga gipahibalo sa TV5 ang ilang pag-withdraw sa NBAC tungod kay misimpatiya sila sa usa nila ka player kinsa gi-protestaan ug dili makaduwa.

Ang team representative sa TV 5 nga si Rudy Quimod mitug-an sa Banat sports nga nasagmuyo sila dihang gidaginot ug protesta ang ilang player nga unta nakaduwa naman siya sa miaging tuig.

Matod pa ni Quimod nga ang TV 5 mao man gani ang second placer sa miaging tuig human sila mapilde sa GMA-7.

Ang player nga gprotestaan sakop sa news department ug ang iyang ID card aduna pay pirma sa station manager  sa TV 5 nga si Karla Kintanar-Fernandez. (BANAT NEWS)