Prime Asia moinat sa ilang daog

CEBU, Philippines -  Tinguha sa Prime Asia Lending/UV Lancers nga inaton ang ilang winning streak ngadto sa unom dihang ilang ikasangka ang San Marino Tuna/CIT-U Wildcats karong adlawa  sa pagsugod sa second round  of elimination sa Enervon CESAFI Partner's Cup 2013 basketball tournament didto sa Cebu Coliseum.

 Ang Prime Asia makigsangka sa San Marino sa alas-4 sa hapon, samtang ang Raphael's Café/USJ-R Jaguars maninguhang mokulit og daog  sa ilang duwa batok sa Lion Tiger-USPF Panthers sa main game sa alas-5:45 sa hapon.

 Ang Prime Asia nagbitbit karon og 5-0 nga baraha, apan daw walay hasol nga ila na sab haruson ang second round ug daku'g posibilidad nga makadepensa sila sa ilang korona nga dili makasinati og bisan usa ka pilde.

 Wala pa makapakita'g senyales ang ubang teams nga mopakgang sa Prime Asia bisan gani ang ilang higpit nga karibal ang Gaisano Capital South/UC Webmasters.

 Ang Prime Asia midemolis sa San Marino sa first round, 91-73 ug hayan mao lang gihapon kini resulta sa second round tungod kay ang ilang mga lokal lang ang midominar sa duwa ug wala sila magsalig sa ilang duha ka Cameroonian recruits nga silang Steve Cedrick Akomo ug Mike Harry Nzensseu.

 Ang reigning CESAFI MVP nga si Wowie Escocio mao gihapon ang mangulo sa Prime Asia uban sa beteranong playmaker nga si John Michael Abad, Chris Perolino, Rhaffy Octobre, Francisco  Arong, Vincent Mendoza ug Alfred Codilla.

 Sa ilang bahin, ang San Marino nga adunay 2-3 nga baraha, magsalig nilang  Allan Dimco, Vincent Menguito,

Joshua dela Cerna, Floyd Taboada ug Franklyn Batiquin.

 Gikatakdang mobalik na sila si Rendell Senining ug Fletcher Galvez sa line-up sa Raphael’s Cafe sa ilang pakigsangka batok sa 1-4 nga Lion Tiger. (BANAT PALARO)