Nietes kampiyon gihapon...apan kampo sa Mexican nangangkon usab og daug

CEBU, Philippines - Napanalipdan ni ALA Boxing Gym superstar Donnie ‘Ahas’ Nietes (31-1, 17KOs) ang iyang WBO light flyweight title human miresulta sa usa ka majority draw ang iyang sangka ni Mexican Moises Fuentes (26-2, 20KOs) niadtong miaging gabii sa main event sa ‘Pinoy Pride XVIII’ didto sa Waterfront Hotel and Casino.

Nahimong usa ka kulbahinam og delikado ang maong sangka alang ni Nietes kinsa nagkadugo atol sa away human magisi ang duha niya ka kilay.

Unang mipakita sa iyang abilidad sa pagpasulod og mga kusug nga kinumo si Nietes sa sayung bahin sa away nga mipatay-og ni Fuentes, apan wala magpaalkanse ang Mehikano ug mibawos siya gamit ang mga bangis nga body punches.

Miaksyon og hinay si Nietes sa tunga-tungang bahin sa away ug atol sa sixth round, mipakita og kaagresibo si Fuentes kinsa padayon nga mibomba og mga kumo ngadto sa Filipino boxer.

Dungan sa pagkusug sa agas sa dugo sa samad sa kilay ni Nietes, mao ang padayun pag-abante ni Fuentes, apan gipakita ni Nietes ang iyang kaisug human usab siya mipalusot og mga counter-punches ngadto sa Mexican.

Ang katapusang bahin sa away maoy nahimong yawi sa kadaugan ni Nietes human niya nalihayan ang mga kumo ni Fuentes dungan sa pagpasud sa iyang mga uppercut ug hooks.

Atol sa dose ka hugna nga sinumbagay duha ka mga international judges nga sila si Adelaide Byrd ug Pat Rusell pulos mitabla sa iskor 114-all, samtang si Danrex Tapdasan mihatag og 115-113 ngadto ni Nietes.

“I think Nietes did enough to win, he fought a very smart fight,” matud pa ni ALA Promotions president Michael Aldeguer.

Si Nietes nagtuo usab nga siya gyud ang mipatigbabaw sa away bisan pa sa sikit nga iskor sa mga hurado.

“Nakapasud ko og mga limpyo nga sukmag, wa man ko maluya kato miatras ko, nag-maintain man mi og phase,” matud pa ni Nietes kinsa miangkon usab nga daku og sagabal ang nahatag sa gisi sa iyang kilay sa maong away.

Nagmakuli pag-atubang sa mga sakop sa media ang kampo ni Fuentes nga gilangkuban ni Mexican legend Marco Antonio Barrera, apan tataw kaayo ang pagsupak nila sa desisyon sa mga judges tungod kay alang kanila si Fuentes ang midaog.

Dili hinuon mobalibad si Nietes kun mangayo og rematch si Fuentes. “Sugot ko og rematch ug mas nindot kun adto sa US ang sunod namo away.”

Sa supporting bout, pulos usab mipaundang sa tagsa-tagsa nila ka mga kaatbang sila si undefeated ALA fighter Genesis ‘Azukal’ Servania ug Jimrex ‘Executioner’ Jaca.

Si Servania (19-0, 7KOs) human niya gipasurender sa seventh round ang Indonesian veteran nga si Angky Angkota (26-9, 14KOs) kinsa nanghilam-os sa kaugalingon niyang dugo human mabuak iyang ilog agi sa kumo sa Bacolod City boxer.

Samtang si Jaca (37-6, 21KOs) mipatumba usab sa Thai nga si Rachamongkol Sor Pleonchit (13-5, 5KOs) sa seventh round.