Bugtong paglaum makuha sa Petron, rekomendasyon gikan ni Robert Non

CEBU, Philippines - Dili pa lang dugay, may usa ka artikulo nga migawas sa facebook kalabot sa pag-umento sa duwa ni Informatics shooting guard Moncrief Rogado didto sa PBA D-League sa Manila. 

Ang maong sports item migawas sa usa ka blog gikan sa SPIN kung Sports Interactive Network.com.

Dinhe sa Sugbo, diyutay tingali ang wala makaila kang Rogado ug mahimong dili siya pareho kasikat nilang Gregg Slaughter ug June Mar Fajardo, apan usa siya ka record holder sa three-point shootout sa Cebu Schools Athletic Foundation Inc. (CESAFI) sa didto sa siya magtungha sa University of Southern Philippines-Foundation. Niadtong tuiga sa pagpahigayon sa CESAFI All-Star Game, ang iyang teammate nga si Elwin Durano maoy nahimong slam dunk champion.

Misamot pagsulbong ang career ni Rogado sa CESAFI dihang mibalhin siya sa University of Cebu (UC) Webmasters tungod kay siya maoy nahimong licensed gunner sa maong team ni coach Roel Gomez.Wala hinoon siya malakip sa champion team sa UC apan nakaduwa siya'g finals usa ka higayon sa wala pa mogradwar.

Nakabig ug nadani ang atensiyon sa Petron team manager nga si Robert Non sa gipakita ni Rogado sa D-League  diin siya maoy leading scorer sa Informatics.

Nahimo na kaniadto si Rogado nga practice player sa Petron Blaze apan wala gyud malakip sa official line-up ug karon nabanhaw ang iyang paglaum nga makaduwa sa Petron ug iyang gi-ampo nga makumbensir unta ni Non ang coaching staff sa Petron ubos ni coach Roderick "Olsen" Racela.

Kung mahitabo kini, mag-reunion silang Fajardo, ang no. 1 draft sa PBA sa miaging tuig ug si Rogado tungod kay pareho silang produkto sa UC. Ang PBA Commissioner's Cup buksan karong Pebrero 8 didto sa Smart-Araneta Coliseum.

Karon nga miumento na ang iyang shooting, kinahanglan lang ni Rogado nga ayohon ang iyang depensa ug dribbling skills aron gyud makasustenir didto sa PBA.

62nd NBA All-Star Game. Nag-atang na sab ang minilyon ka mga NBA fans sa tibuok kalibotan sa umaabot nga NBA All-Star Game karong Pebrero 15-17  didto sa Toyota Center sa Houston, Texas.

Bag-o lang gipahibalo sa NBA ang mga starters sa duha ka teams. Sa West (defending champion),  mao silang Kobe Bryant ug Dwight Howard sa LA. Lakers, Chris Paul ug Blake Griffin sa L.A Clippers ug Kevin Durant sa OKC Thunder. Sa East mao silang LeBron James ug Dwyane Wade sa Miami Heat, Kevin Garnett ug Rajon Rondo sa Boston Celtics ug Carmelo Anthony sa New York Knicks.

Adunay bentaha sa experience ang East All-Stars tungod kay ang ilang starters naglangkub og 43 ka tuig nga All-Star appearances kung itandi sa West nga aduna lay 35 ka tuig. Ang labing daghan mao silang Bryant ug Garnett kinsa 15 na ka tuig nga nakaduwa'g All Star.

Dili pa lang sab dugay, gibutyag sab ang mga All-Star reserves sa duha ka teams.

    Ang mga West reserves mao silang Tim Duncan ug Tony Parker sa San Antonio Spurs, Russell Westbrook sa Oklahoma City Thunder, James Harden sa Houston Rockets, Zach Randolph sa Memphis, David Lee sa Golden State Warriors ug LaMarcus Aldridge  sa Portland.

Ang mga East reserves mao silang Tyson Chandler sa New York, Chris Bosh sa Miami, Paul George sa Indiana, Jrue Holiday sa Philadelphia 76ers,  Kyrie Irving sa Cleveland ug Luol Deng ug Joakim Noah sa Chicago Bulls.

Dinhe sa mga reserves, mas nakabentaha ang West sa experience diin ang ilang mga players nagkumboya og 29 ka tuig kung itandi sa East nga adunay 15 ka tuig nga experience tali kanilang tanan.

MISCELLANEOUS. Belated birthday greetings to my friend who have been celebrating their birthday over the weekends. They are Jonathan "Nino" Imboy of Lite Shipping last Friday, January 25 and also to Rey Yncierto and Percius Curugan who are both former players of UC. Yncierto celebrated his birthday in his residence in Quiot, Pardo while Curugan celebrated his own in Los Angeles, Cal. (BANATSPORTS)