Smart Gilas abante sa finals

CEBU, Philippines - Mimartsa sa finals ang Smart Gilas Pilipinas national team sa 19th Super Keung Sheung Cup International Invitation Basketball Championship human nila ligsi ang Changsha Park Lane, 90-69, atol sa semifinals niadtong miaging gabii didto sa Queen Elizabeth Stadium sa Hong Kong.

Si Niño Canaleta maoy nangulo sa Pilipinas sa iyang 18 puntos ug walo ka rebounds, samtang ang naturalized center nga si Marcus Douthit midarok og 13 puntos ug walo ka rebounds ug ang kanhi collegiate standout nga si Kevin Alas miamot og 10 puntos.

Init ang sugod sa Smart Gilas dihang ila dayung gipabuthan og 26-9 nga labaw ang Changsha Park Lane. Gisirad-an sa national team ang first half nga dala ang 18 puntos nga labaw, 47-29 ug gikan didto wala na nila lingia pa ang ilang kontra.

Nangulo sa Changsa mao si Liu Fuxiang ug Sun Jian nga nagkumboya og 28 puntos.(BANATSPORTS)