Fuentes ‘di takot labanan si Nietes sa Pinas
MANILA, Philippines - Hindi natatakot si Mexican world strawweight titlist Moises Fuentes kung lalabanan niya si Filipino world light flyweight champion Donnie ‘Ahas’ Nietes sa Pilipinas alinman sa Pebrero o Marso ng 2013.
“A champion has to fight the best,” wika ni Fuentes, tinapos ang boxing career ni future Hall of Famer Ivan Calderon via fifth-round KO noong Oktubre sa Puerto Rico. “The winner will be whoever had the best preparation for the fight, Donnie Nietes or Moises Fuentes.”
“It’s not Philippines versus Mexico, it’s just him and I,” dagdag pa ng Mexican boxer.
Sakaling maitakda ang kanilang laban, itataya ni Nietes ang kanyang suot na World Boxing Organization kontra kay Fuentes, ang kasalukuyang WBO strawweight ruler.
Ibinabandera ng 30-anyos na si Nietes ng Murcia, Negros Occidental ang kanyang 31-1-3 win-loss-draw ring record kasama ang 17 knockouts, habang taglay ng 27-anyos na si Fuentes ang 16-1-0 (8 KOs) slate.
“Nietes is a great champion, a legend and an excellent puncher,” sabi ni Fuentes kay Nietes. “It’s an honor to fight him.”
Nakuha ni Nietes ang WBO light flyweight title nang maglista ng isang unanimous decision win kontra kay Ramon Garcia Hirales ng Mexico noong Oktubre 8, 2011 sa University of St. La Salle (USLS) Coliseum sa Bacolod City.
Matagumpay niya itong naidepensa laban kay Mexican Felipe Salguero via unanimous decision win noong Hunyo 2, 2012 sa Resorts World sa Pasay City at huling nanalo noong Nobyembre 17, 2012 kontra kay Danai Maeendaeng noong Nobyembre 17 sa isang non-title fight sa Dumaguete City.
Nauna nang naghari si Nietes sa WBO minimumweight division nang biguin si Pornsawan Porpramook ng Thailand via Unanimous decision noong Setyembre 30, 2009 sa Cebu City.
- Latest
