Lending 3-0 na

CEBU, Philippines - Mikulit sa ilang ikatulong sunod-sunod nga daog ang Aries Lending pinaagi sa pagpilde sa AJY Bong, 84-80 sa Lapu-Lapu Sports Club (LLSC) basketball tournament 2012 niadtong Miyerkules sa gabii didto sa Crown Regency basketball court sa Lapu-Lapu City.

Lima ka players ang mikadlit og double figures alang sa Aries Lending nga gipangulohan ni Rey Sandal, kinsa mibugha og 26 puntos. Si Waray mihirit og 20 puntos, gisundan ni Michael Almodal sa iyang 17 puntos. Sila si Cris Inot ug Walter Bardago mipupo og 15 ug 10 puntos matag usa alang sa Aries Lending ni Tito Francisco.

Nangulo sab sa pilderong AJY Bong mao si John Genolos, kinsa mibagdok og 23 puntos. Ang team owner nga si Alan Yu miduslit og 12 puntos, samtang sila si Adrian Godornez ug Joel Ochea parehong miani og 10 puntos alang sa pilderong koponan.

Sa laing duwa, ang Ballaholic ni Noli Pacquibot nakabawi gikan sa ilang kapildihan pinaagi sa pagbuntog sa Rey's Videoke ni Rey Toledo sa iskor nga 87-79.

Si Kenneth Romero maoy nangulo sa kadaugan nga mirehistro og 15 puntos, sila si Roel Godinez ug Inihao milansang og 14 puntos matag usa, gisundan ni Lito Bensi nga adunay 13 puntos.

Ang liga gipaluyohan nilang Rolly dela Pieza, Roilan Sumilang, Alan Yu ug sa JB Sportswear ni Billy Nadado. (BANAT)

PUNTOS MATAG USA

Unang duwa:

BALLAHOLIC (87) - Romero 15, Inihao 14, Godinez 14, Bensi 13, Dignos 8, Pogoy 8, Cañete 8, Paquibot 8, Omaña 2

REY'S VIDEOKE (79) - Arong 20, Cañete 20, Oyao 19, Intong 8, Benero 7, Guevarra 6, Asejo 4, Booc 2

 Ikaduhang duwa:

ARIES LENDING (84) - Sandal 26, Waray 20, Almodal 17, Inot 15, Bardago 10, Patalinghug 9, Artiaga 4, Miranda 4, Tejano 2

AJY BONG (80) - Genolos 23, Yu 12, Ochea 10, Godornez 10, Flores 5, Aton 4, Begante 3, Tero 2, Gimena