Aries Lending nakasagunson duha ka daog sa LLSC caging

CEBU, Philippines - Mikulit sa ilang ikaduhang sunod-sunod nga daog ang Aries Lending ni Tito Francisco pinaagi sa pagpilde sa Orya Farms/Comfa General Merchandise,   79-89 sa 2012 Lapu-Lapu Sports Club (LLSC) basketball tournament niadtong Biyernes sa gabii didto sa Crown Regency basketball court, Lapu-Lapu City.

Upat ka players sa Aries Lending ang miiskor og double figures nga gipangulohan ni Ely Waray sa iyang 19 puntos.

Si Rey Sandal miposte og 13 puntos, gisundan ni Michael Almodal sa iyang 11 puntos ug Inot nga adunay 10 puntos.

Ang Orya Farms/Comfa nilang Elly Gomos ug Roger Ompad gipangulohan ni Sherwin Candilada, kinsa miburak og 20 puntos. Sila si Roger Ompad ug Badong Casinillo nagkumboya og 21 puntos alang sa Orya Farms.

Sa laing aksiyon, si Flores mipauwan og 20 puntos aron pangulohan ang AJY Bong   pagtumba sa Mega LA/Johnmar nilang Lheo Almacin ug Marlon Llenes, 88-82. Si AJY Bong team owner Alan Yu miamot og 10 puntos alang sa ilang 1-1 record.                Gipangulohan ni Gil Booc ang Mega LA pinaagi sa pagpabuto og 22 puntos. Gisundan ni Pompy Ngujo sa iyang 20 puntos, si Marlon Llenes mihirit og 12 puntos alang sa Mega LA nga wala pa makatilaw og daog sud sa duha ka duwa ning maong liga nga gipaluyohan ni Rolly dela Pieza, Roilan Sumilang, Alan Yu ug sa JB Sportswear ni Billy Nadado. (BANAT SPORTS)