Arc Araw-Araw, Gabby Gabby ang Eagle rookie sa CESAFI

CEBU, Philippines - Nahimout ako nagtan-aw sa usa ka t-shirt nga may markang "Maaasahan sa Araw-Araw" nga gisul-ob sa usa ka ginikanan nga diha sa akong luyo dapit sa may stage samtang nag-cover ako sa high school finals sa nagpadayong Cebu Schools Athletic Foundation, Inc. (CESAFI) tali sa bag-ong champion ang Sacred Heart School-Ateneo de Cebu (SHS-AdC) Magis Eagles kinsa miharus sa defending champion University of the Visayas (UV) Baby Lancers, 3-0 sa ilang best-of-five championship showdown.

Ako dayong nahibaw-an nga ang maong lalaki amahan diay ni Arc Gabrielle Araw-Araw, ang Rookie of the Year sa CESAFI nga si Engr. Ariel Araw-Araw. Tungod lagi sa maong marka nga haum sab kaayo alang sa iyang anak nga si Arc-Gen, nakahuna-huna dayon ako nga maoy akong himoong titulo sa akong lindog kay lagi mahiligon man ako sa garay o 'rhyme.'

Bata pa lang kini si Arc-Gen, daan na kining nagpakita og impresibong mga basketball moves ilabi na sa dribbling aron mahimong usa ka hanas, banggi-itan ug kursonadang point guard ug tuod man, siya maoy napiling MVP sa 2004 Future Basketball League (FBL) samtang nagtungha pa siya sa elementarya. Niadtong 2008, napili sab siya sa labing unang grupo sa Jr. NBA dinhi sa Sugbo ug niadtong 2010, miduwa siya og usa ka tuig didto sa San Beda College (SBC) isip sakop sa dominante kaayong Red Cubs ubos ni coach Britt Carlo Reroma.

Mibalik siya sa Sugbo human sa usa ka seaosn sa NCAA ug didto misamot kalantip ang iyang pangutok sa basketball. Akong gipangutana si Britt kung nganong mibiya man siya nga tua man sa Manila magpundok ang mga maayong laki sa basketball ug daling madiskubre alang sa mga inilang tunghaan didto sama pananglit sa San Beda, Ateneo o dili ba hinoon sa La Salle ug mi-ingon si Britt kanako nga ang kamingaw sa iyang pamilya ug mga higala maoy nakapa-undang ni Arc-Gen didto tungod kay naglisod sab siya'g adjust sa iyang kinabuhi didto sa Manila.

Mas duol sa maayong kaugmaon sa basketball kung adto ka sa unibersidad o kolehiyo sa Manila magduwa ug ang ubang player dinhi sa Sugbo usahay motuyo og lupad ngadto sa Manila aron mo-tryout.

Hinoon bata pa man kini si Arc-Gen kinsa 17 anyos pa lamang ug aduna pa'y dakung kaugmaon sa basketball.Tungod sa iyang na-angkon nga pasidungog sa CESAFI, dili sab layo ang tsansa nga makuha sab siya'g balik bisan asa nga unibersidad didto.

Sa Game 1 dihang medyo nagkalisod ug nabiyaan ang Magis Eagles, duha ka higayon nga si Arc-Gen maoy naghatag sa labaw sa iyang team ug maoy nangu sa opensa sa iyang 18 puntos. Sa Game 2, igo nalang siyang miamot og 7 puntos apan ang kakugi sa depensa maoy iyang gipatuman.

Sa wala pa sugdi ang Game 2 diin midaug sila sa iskor 96-82, nalakip siya sa Mythical Five ug dayon napiling Rookie of the Year. Dili mahulagway ang kalipay sa iyang mga mapasigarbuhong ginikanan nga silang Engr. Ariel Araw-Araw ug iyang kapikas nga si Dra. Grace Araw-Araw.

Si Arc-Gen sab ang top scorer sa Game 3 sa championship sa iyang 18 puntos dihang mi-iskor sila'g 77-72 nga kadaugan ug hingpit nga mikulit og school record ug ingon man CESAFI juniors record nga 14-0 sa usa ka season.

Nagpabilin nga usa ka mapahiubsanong bata si Arc-Gen ug niining birtud, tataw nga layo gyud ang iyang maabtan sa natad sa basketball.

Dili sab nako hikalimtan paghisgot dinhi ang laing point guard nga si Rendell Thomas Senining, ang anak sa akong higala nga si Raffy Senining nga usa sab ka basketball patron.

Human sa ilang kadaugan sa Game 1, mibahug og 14 puntos si Rendell bisan og dunay piang sa iyang kamot nga giputos og bendahe. Igo gyud akong moabot sa balay gikan sa internet cafe aron magsuwat sa resulta sa duwa, mi-text dayon kanako si Doc Roel Dejano, ang PT sa CESAFI nga bilib kuno siya ug nakadayeg kang Senining kay bisan ug piangon, naka-deliver sab sa iyang possession isip guard.

Iyang gitandi si Rendell ni Rajon Rondo, ang tang-an ug dangog nga point guard sa Boston Celtics nga kanunay mahimong assist leader sa NBA. Ako sab dayong gitubag si Dr. Dejano nga kung mao kanang estoryaha, Rondoll Senining na siya. (Hahaha, tiaw-tiaw lang ni Boss Raffy ha.)

Sama kang Arc-Gen, duna sab hayag nga kaugmaon sa basketball kini si Rendell nga player sab kanhi sa Jr. NBA ug nakalarga pa gani sa Estados Unidos. Dili lang kining duha apan lakip na sab ang ilang MVP nga si Henric Dawn Ochea ug ingon man ang kinatibuk-ang sakop sa team ubos ni coach Rommel Rasmo.

Congrats ninyong tanan.