P100 mil giandam alang sa Mayor Alegado Cup

CEBU, Philippines - Kapin sa P100,000 nga ganting salapi ang gitagana alang sa mga mananaog sa Mayor Teresa P. Alegado Cup 2012 Fiesta Basketball League nga buksan karong Domingo didto sa Consolacion Sports Complex.

Kawhaan (20) ka koponan ang mosalmot ning usa ka buwan nga torneyo nga gibahin sa duha ka kategoriya -- inter-barangay ug Sangguniang Kabataan (SK).

Ang mokampiyon sa inter-barangay mobulsa og P30,000, samtang ang second ug third placers makadawat og P20,000 ug P10,000.

Ang top three sa SK category makaangkon og P20,000, P15,000 ug P10,000 matag usa.

Matud ni league commissioner Paul Alelu Q. Flores nga ang tanang partisipanteng koponan makadawat og consolation prize nga P5,000.

Ang torneyo gipasiugdahan sa municipal government sa Consolacion ubos sa liderato ni Mayor Alegado ug Vice Mayor Rey Damole uban sa suporta nila ni Cebu 6th District Provincial Board member Arleigh Sitoy, Consolacion ABC President Marilou Casul ug SKF chairman Vito Rolito Villo.

Modala sa officiating ug technicalities sa torneyo mao sila si sports commitee chairman Neil Ferraren uban sa abag ni Flores ug sports coordinators Roy Linaboc, Melquiades Caylan ug Edwin Miñoza.  (BANAT SPORTS)