USC Warriors duwa sa Aloguinsan

CEBU, Philippines - Ang University of San Carlos (USC) Warriors ni coach Julian Macoy mosalmot sa Aloguinsan Mayor's Cup 2012 basketball tournament nga buksan karong Septiyembre 29 didto sa modernong Alodome sa lungsod sa Aloguinsan sa habagatang Sugbu.

Ang Warriors nga gitagak sa University of Cebu (UC) Webmasters sa quarterfinals sa 12th Cebu Schools Athletic Foundation Inc. (CESAFI), usa sa walo ka teams nga misalmot. Nasakop sila sa Group-A uban sa Romerica, Carmen Copper Corporation (CCC) Power Builders ug S.C.A.

Sa Group-B mao ang Roadstar, CCT Roosters, Double R ug JKA.

Unang magbagat sa alas-8 sa gabii mao ang Romerica batok sa S.C.A ug sundan sa duwa tali sa Warriors batok sa Power Builders.

Ang torneyo gipaluyohan ni Mayor Chonse Moreno ug Vice Mayor Cynthia Moreno ug sa kinatibuk-ang sakop sa konseho nga gipangulohan sa ilang sports chairman nga si Toto Biton.

Ang kampiyon makadawat og P100,000, ang second placer mobulsa og P75,000 ug ang third placer mokumkom og P50,000 ug ang fourth placer mobitbit og P20,000.

Ang upat ka teams nga natagak makadawat og P10,000 matag usa.  (BANAT SPORTS)