Tulo ka PBA teams moduwa dinhi sa Sugbu

CEBU, Philippines - Agi'g pagpangandam sa tagsa-tagsa nila ka misyon sa 38th season sa PBA, tulo ka dekalibreng koponan sa PBA ang mopakita sa ilang abilidad sa Sugbu pinaagi sa 2012 Cebu City Mayor Mike Rama Cup nga sugdan sa Septiyembre 21 diha sa Cebu Coliseum.

Pangulohan kini sa reigning Commissioner’s Cup champion San Mig Coffee Mixers (kanhi B-Meg Llamados), uban sa Talk N’ Text Tropang Texters ug Alaska Aces.

Mokompleto sa four-team mini-tournament mao ang host M. Lhuillier Kwarta Padala Cebu Niños.

Ang tulo ka adlaw nga torneyo mosunod sa single-round robin format diin ang makatigum og daghang daog maoy ilhong kampiyon.

Usa sa giatngan sa maong torneyo mao ang giilang Cebuano hotshot sa PBA nga si Dondon Hontiveros, kinsa moduwa sa labing unang higayon uban sa Alaska ug two-time MVP nga si James Yap, kinsa moduwa sa San Mig Coffee.

Gipaabot usab ang pagbalik ni legendary coach Norman Black isip bag-ong head coach sa Talk N’ Text hulip ni coach Chot Reyes, kinsa migiya sa Smart Gilas Pilipinas sa FIBA Asia Cup didto sa Japan.

Sa opening game sa alas-5 sa hapon, ang San Mig Coffee makigharong sa M. Lhuillier, sundan sa duwa tali sa Alaska ug Talk N’ Text sa alas-7 sa gabii.

Ang mga tiket mapalit tag- P300 sa ringside, P250 sa stage seats, P200 sa lower box, P100 sa upper box ug P30 sa general admission.  (BANAT NEWS)