MANILA, Philippines – Matapos si Filipino world eight-division champion Manny Pacquiao, si world flyweight champion Brian ‘The Hawaiian Punch’ Viloria naman ang pagsisilbihan ni Filipino strength and conditioning coach Marvin Somodio.
Makakasama ni Somodio sa corner ni Viloria si Ruben Gomez.
Si Somodio, ang local trainer sa Shape-Up Gym sa Baguio City kung saan nagsasanay si Pacquiao, ang pumalit sa puwesto ni Alex Ariza nang iwanan nito ang paghahanda ni Pacquiao sa kanyang laban kay Timothy Bradley, Jr.
Tinulungan ni trainer Freddie Roach si Somodio na makakuha ng U.S. visa para makapagtrabaho siya sa Wild Card Boxing Gym sa Los Angeles, California.
Katulong si Somodio, pinaghahandaan ni Viloria, ang WBO flyweight titlist, ang kanilang unification fight ni WBA Mexican Hernan ‘Tyson’ Marquez.
Magtatagpo sina Viloria at Marquez sa Setyembre 29 sa Home Depot Center sa Carson, California.
Pinabagsak na ni unified world super bantamweight king Nonito ‘The Filipino Flash’ Donaire, Jr. si Marquez sa eight round noong Hulyo 20, 2010.
Binigo ni Viloria si Mexican Omar Nino Romero via ninth-round technical knockout (TKO) sa kanilang pangatlong paghaharap noong Mayo 13 sa Yñares Sports Arena sa Pasig City, habang binigo ni Marquez si Filipino Richie Mepranum noong Marso 24 via unanimous decision sa kanilang rematch sa isang 10-round, non-title fight sa Sonora, Mexico.