UC, USC tuyong modaog karon

CEBU, Philippines - Tuyo ug tumong karon sa defending champion University of Cebu (UC) Webmasters nga mosakmit sa ikaupat nga puwesto sa ilang duwa batok sa walay daug-daog nga University of Southern Philippines Foundation (USPF) Panthers aron makakuha'g "twice-to-beat" incentives sa quarterfinals sa 12th Cebu Schools Athletic Foundation Inc. (CESAFI) basketball tournament diha sa Cebu Coliseum.

Nagtinguha sab karon ang University of San Carlos (USC) Warriors nga modaog sa ilang sangka karon batok sa Cebu Institute of Technology-University (CIT-U) Wildcats aron mosaka ang ilang ranggo ug makarekober sa ilang pilde bisan pa'g nawad-an na sila sa ilang twice-to-beat advantage human sila gilubong sa Southwestern University (SWU) Cobras, 63-98 sa miaging gabii didto sa USC gym.

Importante alang sa Webmasters nga modaog aron tapuson ang elimination sa 3-3 nga baraha. Tungod kay mas paborito   ang Warriors batok sa Wildcats, adunay dakung purohan nga mahitabong triple-tie tali sa SWU, UC ug USC sa 3-3 nga baraha. Kun mahitabo kini, makabentaha ang Cobras sa ilang taas nga quotient nga 1.25, ang UC adunay .9727 ug ang USC maoy mahimutang sa ikalimang puwesto sa ilang .8418.

Atol unya sa quarterfinals sa Domingo, ang seeded no. 2, 3 ug 4 makabaton og "twice-to-beat" advantage batok sa no. 5, 6 ug 7 seeded. Ang walay pildeng University of the Visayas (UV) Green Lancers (6-0) awtomatik nang miabante sa semifinals.

Bisa'g sila maoy mas paborito, dili angayan mokompiyansa ang Webmasters batok sa Panthers ug makasalig sila sa ilang daku nga pointguard nga si Quinton Brian Heruela ug shooters nga silang Kim Gomez, Kido Cabrera ug Robinson Mohammad.

Sa laing bahin, ang Panthers maghangad sab nilang Joseph Sedurifa, Art Camello, Fritz Dajalos ug sa managsuong Earvin ug James Ferraren. Ang ilang sentro nga si Jomari Sollano kaduha-duhaan pa nga makaduwa tungod sa piang sa tikud atol sa ilang kapildihan ngadto sa University of San Jose-Recoletos (USJ-R) Jaguars.   - BANAT NEWS