Simple Likes ug mbd midaug

CEBU, Philippines - Mikulit og managlahing kadaugan batok sa tagsa-tagsa nila ka karibal ang Simple Likes Barbecue Haus ug ang MBD Law Office kaniadtong Biyernes sa gabii atol sa nagpadayong F. Llamas Youth Association (FYA) basketball tournament didto sa barangay Tisa gym, ning dakbayan.

Sa primerong duwa, mikulit og 36 puntos ang Simple Likes skipper nga si Noel Medalle aron sila modaug batok sa Tupas Bicycle Center sa iskor, 105-97 samtang gilubong sa MBD Law Office ang Harold's Hotel, 91-79.

Tungod sa maong kadaugan, nabuhi ang paglaum sa Simple Likes sa ilang tinguha pag-abante sa semifinals sa ila karong gihuptan nga 3-3 nga baraha ilabi na kay mas paborito sila sa ilang sangka karong gabii batok sa Pimentel Customs Brokerage ni team owner/broker Marty Pimentel.

Silang Lito Mirasol ug Ryan Villaver mibahug og 24 ug 20 puntos matag usa alang sa Simple Likes samtang si Onyot Masongsong midugang og 15 puntos ug ang uban wala na mo-iskor og sobra dos puntos.

Ang walay daog nga Tupas Bicycle Center kinsa adunay 0-5 nga baraha, gipangulohan ni Pangkoy Paracuelles kinsa mibahug og 31 puntos.

Sa laing duwa, silang Tata Laborte ug Dandan Enriquez miposa og 21 ug 20 puntos matag usa alang sa 3-1 nga MBD Law Office ug si Isyot Regudo miposa og 16 puntos ug miamot ang ex-Baby Jaguar nga si Baeng Medalle og 10 puntos.

Silang Dondon Cadungog ug Toper Limbaga parehong mitunol og 19 puntos matag usa alang sa 3-3 nga Harold's Hotel.

Ang tinuig nga torneyo sa FYA gidumala ni tournament chairman Boy Atillo kinsa usa ka barangay councilor sa Punta Princesa uban sa suporta ni Tisa barangay councilor Eddie Cabulao.

Puntos matag usa:

First Game:

Simple Likes (105)—Medalle 36, Mirasol 24, Villaver 20, Masongsong 15, Codilla 2, Dumaguit 2, Trinidad 2, Zapanta 2, Dacayana 2

Tupas Bicycle Center (97)—   P. Paracuelles 31, Lavandero 16, Villacorta 11, Lanojan 11, Paracuelles 10, Haincadto 10, Nudalo 6, Dakoykoy 3

Second Game:

MBD Law Office (91)— Laborte 21, Enriquez 20, Regudo 16, Medalle 10, Albarracin 9, Arreglo 8, Antiporta 3, Parba 2, Abella 2

Harold's Hotel (79)—     Cadingog 19, Limbaga 19, Atuel 18, Sabalande 6, Cal 5, Tolentino 4, Cueme 4, Barro 4