CEBU, Philippines - Bangis nga third quarter rally ang gilusad sa Energen Pilipinas aron mapukan ang Bahrain, 99-72, sa 22nd FIBA Asia Under-18 Championship kagahapon didto sa Buyant Ukhaa Arena sa Ulan Bator, Mongolia.
Human sa ilang 88-83 nga kadaugan batok sa Chinese Taipei, ang Philippine under-18 squad subling mihimo og impresibong kadaugan batok sa Bahrain nga milubong nila og 11 puntos sa first half.
Ang koponan ni Olsen Racela moduwa batok sa No.2 sa laing bracket sa quarterfinals karong adlawa nga mao ang mudaog sa China o Korea.
Si Rodolfo Alejandro maoy nangulo sa Pilipinas sa iyang 23 puntos, samtang ang Cebuano nga si Jerie Pingoy midugang og 18 puntos alang sa Energen nga misakmit sa ilang ikaupat nga daog uban ang usa ka pilde. Ang nationals maoy nag-una sa ilang bracket uban sa Iran ug Chinese Taipei.
Laraw sa Energen Pilipinas nga mapalambo pa ang ilang fifth place finish sa miaging tuig. Ang koponan tinguha nga makakuha og luna sa 2013 FIBA Asia World Under-19 Championship nga ipahigayon didto sa Prague, Czech Republic. - LPM gikan sa Philstar (BANAT NEWS)