Gilas 2 pinaghandaan ang SoKor ngayon

TAIPEI-- Isang hard practice ang ginawa ng Smart Gilas Pilipinas II para paghandaan ang South Korea sa 34th Jones Cup ngayon sa TPEC Gymnasium.

Maghaharap ang Nationals at ang Koreans sa ganap na alas-3 ng hapon kasunod ang limang sunod na laro ng Gilas II kontra sa Japan, Lebanon, Iran, Chinese Taipei at US.

“Even as we won by a big margin Sunday, we don’t have illusions about the coming games. It’s a treacherous trek, starting with the Korea game,” sabi ni national coach Chot Reyes.

“That’s the way Jones Cup is. It’s a very good competition and it’s just how you cope with it. And that’s why we’re here -- to learn and get tested,” dagdag pa nito.

Ang South Korea ang sumegunda sa nagkampeong Iran sa Jones Cup noong nakaraang taon.

Ibabandera ng Koreans ang kanilang champion club team na Anyang KGC na babanderahan nina imports Garrett Stutz at Juan Pattillo.

Ang 6-foot-11 na si Stutz ay inaasahang sasabay kay 6’11 naturalized Marcus Douthit, habang ang 6’6 namang si Pattillo ang sinubukang ipalit ng Meralco Bolts kay Champ Oguchi sa nakaraang 2012 PBA Governors Cup.

Parehong nanggaling sa panalo ang mga Filipinos at Koreans sa kanilang mga huling laro.

Kagaya ng Gilas II at South Korea, may 2-0 record rin ang three-time defending champion na Iran matapos talunin ang Lebanon at Japan.

Itatampok din ng Anyang KGC sina Korean national players Oh Se-Keun, Kim Tae-Sul at Yang Hee-Jong.

Binigo ng South Korea ang Chinese -Taipei B, 109-83, at ang Lebanon 94-78.