Pimentel brokers midaug

CEBU, Philippines - Human mapilde ug sagunson duha ka duwa sa miaging semana, malipayon karon ang Pimentel Customs Brokers ni team owner Marty Pimentel ilabi na kay grabeng kulbahinam ang ilang gibati dihang igo lang silang naka-eskapo og usa ka puntos batok sa Dominic Team nga ilang gipatapsingan sa iskor, 73-72 taliwala sa nag-ungaw na sab untang kapildehan niadtong Biyernes atol sa nagpadayong F. Llamas Youth Association (FYA) basketball tournament didto sa barangay Tisa gym, ning sakbayan.

Si Dexter Caballero maoy nahimong bayani sa Pimentel Brokers dihang nakapasulod siya sa iyang lay-up sa nahibiling 10 segundos hinungdan naglumpayat sa kalipay ang iyang mga kauban ilabi na didto sa bench. Misipyat sa kataposan nilang tirada ang Dominic atol sa buzzer ug nakaginhawa og lawom ang Pimentel kinsa naghupot na karon ug 1-2 nga baraha.

Mibahug og 31 puntos si Caballero lakip ang winning lay-up samtang sila si Henry Sombilon ug Eman Reubal midugang og 12 ug 10 puntos matag usa alang sa krusyal kaayong kadaugan.      

Si Ranel Patalita kinsa usa sab ka leading scorer sa ilang team, maoy nangu sa Dominic sa iyang 25 puntos.

Sa laing duwa, midaug ang MBD Law Office sa iskor, 87-75 batok sa Tupas Bicycle Center ug mao kadto'y ilang ikaduhang daug samtang mao sab kadto'y ikaduhang pilde sa Tupas Bicycle Center.  

Si Dandan Enriquez miposa og 19 puntos aron pangulohan ang MBD Law Office ug midugang si Isyot Regudo og 16 puntos. Laing tulo ka kauban ang mibahug sab og 10 puntos matag usa lakip ang skipper nga si Junrey Arreglo.

Si Pangkoy Paracuelles maoy nangu sa opensa sa Tupas Bicycle Center sa iyang 25 puntos.

Ang torneyo sa FYA gidumala ni Punta Princesa barangay councilor Boy Atillo kinsa maoy tournament director ug gipaluyohan sab ni Tisa barangay councilor Eddie Cabulao.

Puntos matag usa:

First Game:

Pimentel (73) — Caballero 31, Sombilon 12, Reubal 10, Avila 6, Cañete 5, Virtucio 5, Monisit 2, Jabonero 2

Dominic (72) —    Patalita 25, O. Abella 14, Dacayana 13, T. Marata 8, Abella 4, Marata 4, Garcia 3, Malicay 2

Second Game:

MBD Law Office (87) —   Enriquez 19, Regudo 16, Laborte 10, Arreglo 10, Antiporda 10, Medalle 8, Albarracin 5, Sarsaba 5, Parba 2, Abella 2

Tupas Bicycle Center (75) —  Paracuelles 25, Lañojan 14, Kit 11, Dudalo 11, Baldago 6, Haincadto 3