GCM nakaipsot sa Marty Pimentel Brokers

CEBU, Philippines - Nakaikyas ang GCM team ni team captain Tata Laborte bitbit ang 69-59 nga kadaugan batok sa Marty Pimentel Customs Brokers, samtang ang Vaness-Justine midaog sab batok sa Benedict, 57-50 atol sa pagsugod sa tinuig nga F. Llamas Youth Association (FYA) basketball tournament niadtong Miyerkules sa gabii didto sa barangay Tisa gym, ning siyudad.

Si Marnel Tomada, kinsa maoy miduslit sa mainitong rally aron sakmiton ang labaw nga sayong gihuptan sa Pimentel Brokers miiskor og 16 puntos aron pangulohan ang GCM, samtang   si Laborte mihipos og 13 puntos.

Samtang si Dexter Caballero maoy nangu sa Pimentel Brokers sa iyang 23 puntos.

Sa laing bahin, ang team captain sa Vaness nga si Chissar Llegunas miposa og 19 puntos, samtang laing duha ka teammates ang miiskor og double figures. Ang Benedict gipangulohan ni Michael Garcia sa iyang 16 puntos.

Ang FYA tournament gipaluyohan ni Tisa barangay captain Eddie Cabulao ubos sa pagdumala ni tournament chairman Boy Atillo.

PUNTOS MATAG USA

Unang duwa:

GCM (69) - Tomada 16, Laborte 13, Fernandez 11, Oropa 10, Tapdasan 10, Palo 6, E. Fernandez 4, Monte 4

Pimentel Brokers (59) - Caballero 23, Barliso 11, Monisit 8, Simbajon 7, Reubal 5, Cajucson 3, Jabonero 2

Ikaduhang duwa:

Vaness-Justine (57) - Llegunas 19, Teves 13, Sydiongco 12, Jakosalem 6, J. Llegunas 2, Pacaña 2, Villorden 2, Pesarillo 1

Benedict (50) - Garcia 16, Patalita 14, Dacayana 7, Marata 6, Malicay 4, Cañete 2, Abella 2 - BANAT NEWS