Kenyans nanghawod sa St. Ignatius Run
CEBU, Philippines - Gidominar sa Kenyan runners nga silang Josphat Kiptanui ug Abraham Missos ang tagsa-tagsa ka dibisyon sa 2nd St. Ignatius de Loyola Run kagahapon didto sa Insular Square sa North Road, Mandaue City.
Naghari si Kiptanui sa 16K men's open category human niya gitapos ang dagan sa oras nga 53:56.90, gisundan sa laing Kenyan nga si Douglas Mbui nga mioras og 54:56.67 alang sa ikaduha, samtang ang Pinoy nga si Sherwin Manangil mikapyot sa ikatulo sa oras nga 57:36.67.
Sa laing bahin, ang garbo sa Southwestern University nga si Mary Joy Tabal, mioras og 1:04.02 aron langkaton ang korona sa women's class, gisundan ni Mary Grace delos Santos sa oras nga 1:07:33, samtang si Christy Sevilleno-Tutor maoy ikatulo sa oras nga 1:09:17.14.
Sa 6K men's category, si Missos maoy unang mitabok sa finish line sa oras nga 19:16. Iya gipilde silang Joebert Carolino (19:44) ug Darryl Maos (20.09) nga miangkon sa ikaduha ug ikatulong dapit.
Sa women's division, si Lovely Andrin labing paspas sa maong kategory nga mioras og 23:55, si Aiza Suaybaguio (24:27) ug igsuon nga si Cherry Andrin (25:17) mipahiluna sa misunod nga duha ka dapit.
Sa Sacred Heart School-Ateneo 3K category, si Jose Maria Navarro maoy nag-una sa men’s class sa oras nga 12:36, samtang si Celiuna Mae Revalde sa women’s division sa sa oras nga 16:42. (BANAT SPORTS)
- Latest
- Trending
