Philippines overall champion sa 12th WEKAF championships

CEBU, Philippines - Nakab-ot sa Pilipinas ang tam-is nga bunga sa ilang mga paningkamot dihang nakuha nila   pagbalik ang kampiyonato sa 12th World Eskrima Kali Arnis Federation (WEKAF) Championship sa miaging adlaw didto sa Cebu International Convention Center (CICC) sa Mandaue City.

Human sa 12 ka tuig nga pagsuway, natambalan na gyud   ang kauhaw sa host Philippines sa kampiyonato human ang Pinoy eskrimadors mikolekta og 62 ka gold, 36 ka silver ug 36 ka bronze medals alang sa overall championship.

"Our happiness is beyond measure now that we have regained the overall championship after 12 years of waiting. Having restored our lost pride and honor in the indigenous martial art that is close to our heart is a monumental feat that surely brought great joy in all of us," matud pa ni WEKAF International president Master Gerald Cañete.

Lakip sa misidlak alang sa Team Philippines mao ang mga eskrimadors nga nakakuha og triple gold medals nga sila si Reynaldo Combate, Trixie Mary Lofranco ug Florito Fernandez.

Si Combate midaog og golds sa super middleweight division sa single, double stick ug team sparring event, samtang si Lofranco naghari sa 8-9 years old single stick non-traditional open forms, team synchronize ug 6-7 years old single stick.

Sa iyang bahin si Fernandez mikabkab og bulawan sa single stick light middleweight, double stick middleweight ug team sparring.

Ang United States nga pakyas pagdepensa sa titulo miugkat og siyam ka golds, 10 ka silvers ug lima bronzes alang sa ikaduhang dapit, samtang ang Reunion Island sa France maoy miangkon sa ikatulong dapit sa ilang 9-9-9 gold-silver-bronze medals.

Mokompleto sa top 10 mao ang New Zealand (6-5-2), Australia (5-3-7), Poland (4-0-0), Hungary (3-7-2), Canada (3-4-3), Norway (3-4-0) ug Ireland (2-3-5).

Sa laing bahin, ang Hungary mao na sab ang mo-host sa 13th edition sa WEKAF Championship sa tuig 2014.  (BANAT SPORTS)