Luigi Bercede sa Cafe France

Karong Oktubre, lain na sab nga Sugbuanon gikan sa dakbayan sa Mandaue ang mopakita sa iyang labok sa PBA D-League.

Si Francis Luigi Bercede, anak ni Mandaue City Vice Mayor Glen Bercede, moduwa na sa PBA D-League ubos sa Cafe France team ni coach Egay Macaraya, usa sab ka Sugbuanon.

Nagsugod si Bercede sa iyang career sa basketbol sa University of San Carlos (USC) Passarele-Small Basketeers of the Philippines diin usa siya sa mga sinaligan nga pointguard sa maong team.

Samtang nagtungha na siya sa high school, si Bercede nakaduwa sab sa USC Baby Warriors hangtod nahimo siyang sakop sa collegiate varsity team. Wala siya motiwas isip usa ka Warrior tungod kay mibalhin siya sa University of Cebu (UC) Webmasters diin sakop siya sa duha ka championship runs sa 2010 ug 2011. Tungod sa kakugihan niyang modepensa, misaler ang iyang abilidad sa UC ug gihimo siyang hulip kang Kelvin Juliane.

Sakop sab si Bercede sa Webmasters dihang miabante sila isip Visayan Island regional champions sa Philippine Collegiate Champions League (PCCL) kauban sa 6-foot-9 nga si June Mar Fajardo sulod sa duha ka tuig. 

Sa kasamtangan, tua na si Bercede sa Manila aron mosalmot sa praktis sa Cafe France, kinsa gikatakdang mag-usab og ngalan nga "Karate Kid" sa pagbukas sa laing conference karong Oktubre.

Sama sa ubang mga basketball players, ang 23 anyos nga si Bercede nangandoy sab nga makaduwa sa PBA.

NBAC BANHAWON? Ang presidente sa Cebu Federation of Beat Journalists (CFBJ) nga si Elias O. Baquero mipahibalo kanamo atol sa officers' meeting nga adunay posibilidad nga banhawon ang Newsmen Basketball Association of Cebu (NBAC). Amo pa kining tukio'g maayo uban sa mga proponents sa maong kalihukan.

Nagkahuyang ang NBAC ug hinay-hinay kining nabungkag tungod kay wala kaayo matarong ang pagpatuman sa mga lagda. Kini kay ang uban teams molista man sa ilang mga talents (dramatorgo) ug technicians aron lang ma-champion nga anaa ra man unta sa ngalan newsmen. Mapasaylo tingali kini kun ang mga dramatorgo, technicians, security guards ug janitors sa kompaniya maantigo mosuwat og balita. 

Ikaduhang rason nganong mibugnaw ang uban niining NBAC tungod kay nahimo kining sinugdanan sa away, binirahay sa radio program ug atakihay sa mga pamantalaan nga maoy nakaguba sa konsepto niining NBAC isip pagpahugot sa panaghigalaay sa mga sakop sa media. Ngano lagi kun adunay reporter nga ikiha’g libel ato mang paluyohan ug suportahan ang kawsa? Kini kay usa ray tumong sa media nga mao ang pagbutyag sa kamatuoran.

Kami ni Rommel Manlosa nag-agi og pangluod kaniadto dihang napilde ang The Freeman team sa Sunstar ug nahilot ra sab dayon ang among panaglalis sa bench tali ni Dodong Guden sa DYMF Bombo Radyo. Gikan niadto, misamot kami kasuod ni Dodong Guden ug kanunay kami mag-chat sa Facebook gikan sa iyang mabugnaw nga gipuy-an didto sa Minnesota, USA, ang orihinal nga franchise owner sa L.A. Lakers nga giila kaniadto og Minneapolis Lakers.

Dunay sugyot nga ang composition sa team by beat ug duna say gustong by publication or station. Mao kini ang angay namong desisyonan sa sunod namong meeting.

CFBJ Night RUN. Gawas sa basketbol, duna say dakung kalihukan nga gustong himuon ang CFBJ nga angayan sab natong suportahan kay ang makita niining maong proyekto ato mang gamiton sa atong pagsaulog sa umaabot nga Press Freedom Week karong Septiyembre.

Ato kining tawgon og CFBJ Night Run nga pagahimuon sa Agosto 11 gikan sa Plaza Independencia ngadto na sa SRP. Aduna kini tulo ka kategoriya -- 3k, 6k ug 12k ug bukas kini sa tanang   running enthusiasts.

MISCELLANEOUS. Two important alumni events will be observed this Saturday, July 21. First is the USJR High School Batch ’76 grand alumni homecoming starting at 8 a.m. at the USJR Basak Campus. All members are enjoined to participate in this rare gathering. For more information, interested parties may contact Joji Enriquez at 0922-4264169, Jun Saberon at 0917-6358210, Leah Bullecer at 0932-587-7246 and Lewin Abella at 0916-559-7513. Batchmates from U.S.A. and other foreign countries are coming to Cebu to attend. Second is the gathering of the USC Green and Gold Warriors Association at 7:30 pm. at the Baseline Restaurant. They elected their officers last July 4. Nilo Velasquez (president),   Ramon Fernandez (vice-president), Raul Reyes (secretary), Julian Macoy (treasurer). Ret. Justice Christoher Lock, Doring Canizares, Boy Mansueto and Arsenio Solon (board of trustees).