McGee adto sa Nuggets?

CEBU, Philippines - Ang NBA free agent nga si JaVale Mcgee nagmagahi pa karong tungora kung mopirma ba siya pag-sab sa Denver Nuggets.

Sa iyang kapin upat ka seasons didto sa Washington Wizards, nahimong kataw-anan ang career ni McGee tungod kay siya ang matang sa player nga magpataka lang og dagan ug lain maoy padulngan bisan kung ang iyang team maoy adunay ball possession.

Dayon, sa iyang hamubong panahon isip usa ka sakop sa Nuggets, nagpakita og tilimad-on si McGee nga mahimong usa ka maayong starting center ug nakaduwa og pipila ka higayon sa playoff batok sa Los Angeles Lakers apan sa gihapon, gihimo sab siyang kataw-anan.

Si McGee kinsa usa ka mahalon nga restricted free agent apan ang wala hibaw-i sa uban nga siya adunay gahum nga makapausab og usa ka desisyon. Miuyon na ang Nuggets nga papirmahon siya'g usab apan si McGee maoy dili pa andam kung mopirma ba siya'g bag-ong kontrata.

Maoy tumong sa Nuggets nga kuhaon si McGee kinsa adunay lima ka tuig nga kontrata nga balor ug 50 milyones dolyares apan ang representante ni McGee wala magdali aron tukbon ang maong tanyag ug padayon pang nakigsabot-sabot.

Ang tanyag sa Nuggets maayo na kaayo alang kang McGee tungod kay dili sab kaayo siya'g maayo'ng performance isip big man diin duna lang siya'y10.3 points per game, 5.8 rebounds per game ug 1.6 blocks per game sulod sa 20 ka duwa sa regular season. Daghang mahitabo sa usa ka big man sulod sa lima ka tuig ilabi na ang piang sa tiil. 

Si McGee mao ang player nga gustong himoon nga naturalized Filipino citizen aron makaduwa sa Smart Gilas-RP Team.

Nag-ung-ong pa karon sa Kongreso ang protesta alang sa maong lakang diin gisupak kini nilang Cebu Schools Athletic Foundation, Inc. (CESAFI) Commissioenr Felix O. Tiukinhoy, Jr. UC Webmasters team manager Atty. Baldomero C. Estenzo ug kanhi UP Fighting Maroons ug national team coach Joe Lipa.  – BANAT NEWS