MANILA, Philippines - Pumasok na sa quarterfinals sa 2012 Guinnes World Series of Pool-Speed Ball Challenge sina Dennis Orcollo nang talunin si Adolof Leunupun ng Indonesia kahapon sa Surabaya, Indonesia.
Nasa quarters na rin si Jeffrey De Luna nang talunin ang pambato ng Indons na si Ricky Yang para lumaki ang tsansa ng bansa na manalo sa torneong ito.
Kinailangan lamang ni Orcollo ng limang minuto at 18 segundo para tapusin ang limang racks laban sa 8:13 ng katunggali.
Si De Luna ay naorasan naman ng eksaktong 5 minuto laban sa 5:38 ni Yang.
Sunod na kalaban ni Orcollo na may iniindang sipon, ang isa pang Indon bet sa katauhan ni Cherry Suliawan na tinalo ang kababayang si Iwan Saga, 5:58 laban sa 7:49, para sa puwesto sa semifinals.
Si De Luna ay mapapasabak sa mabigat na laban kontra kay Darren Appleton ng Great Britain na pinagpahinga si Shane Van Boening ng US, 4:33 -5:09.