Pinaksitay na sa coliseum

CEBU, Philippines - Kulbahinam nga aksiyon sa Mixed Martial Arts (MMA) ang masaksihan sa pagsikad sa "Ground and Pound VI: Invincible: karong gabii diha sa Cebu Coliseum.

Makasaysayanon ang maong edisyon sa Ground and Pound series nga gipasiugdahan sa Yaw-Yan Cebu ArDigma Martial Arts Federation, Inc. ni Founder and CEO Master Benigno 'Ekin' R. Caniga Jr. tungod kay kini ang labing unang higayon nga duha ka bakus ang ilogan.

Sa main event, ang pambato sa Mandaue City nga si Mark 'The Terminator' Araneta sa Team UMMA-Mandaue makigpinaksitay ni Lorde Rey 'The Punisher' Yamit sa Butuan Extreme MMA alang sa GNP lightweight crown.

Lahi sa ilang tinagdanay sa press conference niadtong Huwebes, wala na magbinaharay, apan mipakita na hinuon og dakung respeto sa usa'g-usa ang duha ka fighters atol sa weigh-in didto sa Cebu Coliseum.

"I respect Araneta, nag-train siya og maayo, ako pud nag-train og maayo, tan-awon na lang nato ibabaw sa ring kinsa ang mudaog," matud pa ni Yamit nga mitimbang og 159 lbs, labaw og unom ka libra ni Araneta.

"Pulos mi nangandam pag-maayo, may the best man win na lang," matud pa usab ni Araneta nga adunay rekord nga 5-2, 5KOs, samtang si Yamit nagtangag og 7-3, 5KOs record.

Sa supporting main event, magsangka sila si Renan 'Limbas' Noblefranca sa Yaw-Yan ArDigma Cebu Top Team ug Steve "D' Lightning" Sevilleno sa Team MUMMA-Manila alang sa YFCC bantamweight belt.

Angay usab nga atngan ang makasaysayanong gubat nga uloha'g "Founder vs. Founder" tali nila ni Allan 'The Dancing Man' Epile sa Soma KBC ug Ben 'Durex Warrior' Torbiso sa Durex Dragon KBC.

Gawas ni Noblefranca, laing upat ka miyembro sa Yaw-Yan ArDigma Cebu Top Team ang mopakita sab sa ilang katakus.

Sila mao si Keith 'Ice' Acapulco, Roel 'Akiyama' Rosauro, Lemuel 'Musang' Maglinte ug British Cris Thompson 'Lindol' Brooks.

Si Acapulco mosukod sa abilidad ni Ryan Salomon, si Rosauro makigharong ni Israel Gomez,   si Maglinte makigsangka ni Zoren Pescador ug si Brooks makigbinukbukay ni Jerry Sabayan.

Ang mga tiket nagkantidad og P150 sa upper box, P300 sa lower box, P500 sa ringside ug P1,000 sa VIP section. (BANAT SPORTS)