CEBU, Philippines - Si Tenggoy Colmenares maoy nangu sa panon sa Cebuano triathletes nga nidaog sa labing uwahing edisyon sa Century Tuna National Age-Group Triathlon (NAGT) Series didto sa Cagayan de Oro City.
Nanghawod si Colmenares sa 45-49 category human niya gihuman ang kompetisyon sud sa duha ka oras, 23 minutos ug 16 segundos.
Timaan kini nga andam na siya sa laing pagsuway nga mohari sa iyang age-group sa Cobra Ironman 70.3 Philippines sa Agosto 5 didto sa Shangri-La Mactan Resort and Spa sa Lapu-Lapu City.
Ang magtiayong Noy ug Amale Jopson misalmot sab sa maong kalihukan nga kabahin sa ilang subsob nga pagpangandam sa labing daku nga triathlon event dinhi sa Sugbu.
Si Amale ikaduha sa 30-above class, samtang ang iyang kaubang Sugbuana nga si Michelle Aya Shlachter ug Anna Maria 'Annie' Neric mipahiluna sa ikaupat ug ikalima nga dapit.
Ang bana ni Amale nga si Noy midaog og silver medal sa men's 35-39 class, samtang si Jose Lim mitapos sa ikatulo sa 30-34 division.
Lain pang age-group winners naglakip nilang Mary Pauline Fornea ug Banor Norte (17-19), Kathlene Co (20-29) ug Shai Bacus (30-above).
Sa pikas bahin, mao sila si Peter Villocino (20-24), Jean Patrick Serrano (25-29), Jemarvin Cabilan (30-34), Christopher Eyao (35-39), Ferdinand Sogoc (40-44), Allen Nitollama (50-54), ug Killu Kunimoto (60-above). (BANAT SPORTS)