MANILA, Philippines - Matapos kunin ng Tropang Texters ang isang 15-point lead sa first period ay hindi na nakaporma ang talsik nang Bolts.
Nagposte ng isang 33-point advantage sa fourth quarter, madaling iniligpit ng Talk ‘N Text ang Meralco, 108-84, upang buhayin ang kanilang tsansa sa playoff para sa ikalawang finals berth sa 2012 PBA Governors Cup kahapon sa Smart-Araneta Coliseum.
“We have no choice but to win our remaining games,” ani coach Chot Reyes. “We are in a situation na one miss we die. Even if we sweep out, we still need to beat somebody in a playoff.”
Kailangang walisin ng Tropang Texters ang kanilang mga laro kontra sa nagdedepensang Petron Blaze Boosters, Rain or Shine Elasto Painters at Ginebra Gin Kings para makakuha ng 4-of-5 incentive sa carryover semifinal round na magbibigay sa kanila ng playoff para sa pangalawang finals slot.
Mula sa 31-16 abante sa first quarter ay itinayo ng Tropang Texters ang 57-35 bentahe sa 4:22 ng second period hanggang ibaon ang Bolts sa 96-63 sa pagsisimula ng final canto para tiyakin ang kanilang tagumpay.
Kasalukuyang tangan ng Rain or Shine ang 9-2 record kasunod ang B-Meg (7-3), Ginebra (7-4), Petron (6-5), Talk ‘N Text (6-5) at talsik nang Meralco (4-8).
Kasalukuyan pang naglalaro ang Llamados at ang Boosters habang isinusulat ito.
Samantala, puntirya naman ng Elasto Painters ang unang finals berth sa pakikipaglaban sa inspiradong Gin Kings ngayong alas-8 ng gabi sa SM Mall of Asia Arena sa Pasay City.
Ang panalo ng Rain or Shine, nanggaling sa 99-86 paggupo laban sa Meralco noong Linggo, ang mag-aakay sa kanila sa una nilang finals appearance, habang ang tagumpay naman ng Ginebra ang magbibigay sa kanila ng isang playoff ticket para sa ikalawang finals seat.
Talk N Text 108 - De Ocampo 24, Aguilar 20, Alapag 12, Williams 11, Harris 10, Peek 8, Castro 7, Fonacier 5, Alvarez 5, Raymundo 4, Gamalinda 2, Aban 0, Lao 0.
Meralco 84 - West 21, Cardona 13, Daa 11, Mercado 9, Bulawan 8, Taulava 6, Hugnatan 5, Ballesteros 4, Reyes 4, Borboran 3, Ross 0, Timberlake 0, Artadi 0.
Quarterscores: 31-16, 64-43, 89-63, 108-84.