CEBU, Philippines - Gitakdang moabot dinhi sa Sugbu ugma ang mga dekalibreng Mixed Martial Arts (MMA) fighters gikan sa Mindanao alang sa gipaabot nga Ground and Pound VI: Invincible nga kumbatihan karong Sabado diha sa Cebu Coliseum.
Pangulohan kini ni submission specialist Lorde Rey 'The Punisher' Yamit sa Butuan Extreme MMA. Atubangon ni Yamit ang pambato sa Team Unified MMA sa Mandaue City nga si Mark 'The Terminator' Araneta.
Sila si Yamit ug Araneta mag-ilog sa GPC lightweight title ning maong kompetisyon nga gipasiugdahan sa Yaw-Yan Cebu ArDigma Martial Arts Federation, Inc. ni Founder ug CEO Master Benigno 'Ekin' R. Caniga Jr.
Uban ni Yamit nga moasdang sa Sugbu mao sila si Rocky Tune 'The Outlaw' Batolbatol, undefeated Jonathan 'Mata De Leo' Esquierdo, Urtych 'The Machine' Alarin, Israel 'Fast Learner' Gomez, Carlo 'The Masterpiece' Mabilin ug Brian 'D Kid' Paciete.
Ang mga tiket nagkantidad og P150 sa upper box, P300 sa lower box, P500 sa ringside ug P1,000 alang sa VIP.
Alang sa dugang mga pangutana, mahimong motawag sa numero 255-8919, 255-1405 o 0932-4524999. - BANAT NEWS