Convergys, 6-0 na sa E-League

CEBU, Philippines - Padayong nagmangtas ang Convergys Wolves dihang ilang gipanitan ang Qualfon Knights, 96-70 sa Sun Cellular-presented 8th CSCC E-League basketball tournament niadtong Sabado sa gabii didto sa City Sports Club-Cebu gym sa Cebu Business Park.

Lima ka players ang mitimbre og double figures nga gipangunahan ni Kristian Tapic pinaagi sa iyang 18 puntos uban ang tulo ka steals alang sa Convergys, kinsa nagpabiling walay pilde sa Northern Conference sa ilang 6-0 nga baraha.

Laing upat nga naka-double figures naglakip ni Ellison Rivera (14 points), Joshua Ryan Yam (13 points), Ronald Mabanto (12 points) ug Philip Villarin (11 puntos).

Ang Convergys wala na molingi human moposte og 25-12 paghuman sa unang 10 minutos sa duwa ug gani milawom pa ang lubong ngadto sa 22 puntos, 47-25 sa halftime. Ang Convergys padayong miataki sa Qualfon sa final period aron maangkon ang 26 puntos nga kadaugan.

Si Jopher Regidor mikadlit og game-high 25 puntos uban ang upat ka rebounds ug upat sab ka steals, apan ang iyang mga paningkamot wala kapusli dihang ang Qualfon nahagsa bitbit ang 4-4 nga baraha.

Sa laing mga duwa, si Jan O'Neil Sahilan mipupo og 20 puntos alang sa Sykes Pioneers nga milubong sa SupportSave Jaguars, 78-56, samtang sila si Dennis Noel Poquita ug Reymund Ardiente mituhog og 15 puntos matag usa alang sa SSI Pure Science nga mipukan sa Odusee Rooz sa iskor nga 79-65.

Si Carl Michael Troy Umabong miugsok og 16 puntos ug milangkat og lima ka rebounds, samtang si Rey Louie Lepardo miabuno og 12 puntos alang sa Sykes nga nagtangag og 5-2 nga baraha.

Sa laing bahin, si Kenneth Robert Abrante miiskor og 24 puntos aron pangulohan ang Odusee nga nakaangkon sa ilang ikatulong pilde sa unom ka duwa.

PUNTOS MATAG USA

Unang duwa:

Sykes (78) - Sahilan 20, Umabong 16, Lepardo 12, Te 8, Castañares 6, Pardenilla 6, Suarez 4, Sultan 2, Diotay 2, Diputado 2

SupportSave (56) - Bantilan 17, Paradiang 11, Blanes 8, Campomanes 5, Vacalares 5, Perez 4, Pongan 4, Ballesteros 2

Ikaduhang duwa:

SSI (79) - Ardiente 15, Poquita 15, Gabutin 11, Campaña 11, Tomakin 7, Alinson 6, Rivera 4, Auditor 2, Español 2, Impoc 2, Lacsamana 2, Lepaopao 2

Odusee (65) - Abrantes 24, Abellanosa 14, Igot 10, Amante 7, Cabilino 7, Degoro 3

Ikatulong duwa:

Convergys (96) - Tapic 18, Rivera 14, Yam 13, Mabanto 12, Villarin 11, Del Mar 6, Española 6, Loyola 6, Cipres 6, Mora 4

Qualfon (70) - Regidor 25, Sanchez 10, Barbon 7, Enriquez 6, Cuico 4, Luzon 4, Pascua 4, Matuguina 3, Gelbolingo 2, Maglasang 2, Perez 2, Llesol 1   (BANAT SPORTS)