MANILA, Philippines - Agawan sa mahalagang panalo na magpapatibay sa paghahabol sa puwesto sa quarterfinals ang magaganap sa pagitan ng Letran at UST sa pagpapatuloy ng 2012 Filoil Flying V Pre-Season Hanes Cup ngayon sa The Arena sa San Juan City.
May 4-2 karta ang Knights habang 3-3 naman ang baraha ng Tigers kaya’t ang mananalo ay mananatili sa mahalagang ikaapat na puwesto sa Group A.
Ang San Beda at Ateneo na may 7-0 at 6-1 karta ay nasa quarterfinals na at kasalukuyang nasa US para sa kanilang taunang pagsasanay.
Ang laro ng Letran at UST ay itinakda sa ganap na ika-3:30 ng hapon matapos ang bakbakan ng Perpetual Help at UE sa ganap na ala-1:45 ng hapon.
Katunggali naman ng La Salle (4-2) ang Mapua Cardinal (1-6) sa ikatlong laro dakong alas-5:15 ng hapon na siyang huling laro sa seniors division.
Samantala, nagsisimula ng magbenta ng tiket para sa larong Ateneo at La Salle sa Hunyo 2 sa ganap na alas-6 ng gabi at ang presyo ay P400 sa ringside, P300 sa lower box at p150 sa upper box.
Ang mga tiket ay mabibili sa SM Tickets sa teleponong 470-2222.
Ang Eagles-Archers game ay mapapanood sa delayed basis sa ABS-CBN Studio 23 dahil ang airing nito ay sa ganap na ika-11:30 ng gabi at may replay kinabukasan sa alas -3:30 ng hapon.