Mr. Perfect Body tilt karon sa Pacific Mall
CEBU, Philippines - Bayente ka bodybuilders gikan sa nagkalain-laing fitness clubs dinhi sa Sugbu ang mopakita sa ilang maskulado nga lawas uban ang paglaum nga modaog sa titulo sa 2012 Mr. Perfect Body bodybuilding competition karong adlawa didto sa Activity Centre sa Pacific Mall (Super Metro) sa Mandaue City.
Ang pasundayag sugdan sa alas-3 sa hapon.
Kapin sa P10,000 nga ganting salapi ang giandam alang sa mga mananaog sa tinuig nga kompetisyon nga nagdala sa tema: Health is more than wealth."
Gawas sa mga tropeyo ug medalya, ang kampiyon makadawat og P5,000, ang second placer makaangkon og P3,000, samtang ang third placer mobulsa og P2,000.
Makadawat sab og P500, P400 ug P300 ug medalya ang mopahiluna sa ikaupat hangtod sa ikaunom nga dapit.
Ang mga hurado nga gikuha ni Nancy L. Yukayguan, ang tag-iya sa Perfect Body Gym naglakip nilang Ben Andales (Mr. Philippines 1978), Wesley Lim (Mr. Philippines 1987), Henley Uy (licensed international bodybuilding judge), Noli Tolentino (Mr. Perfect Body 1987, Mr. Philippines 1990 ug Mr. Bikini Open 1991) ug Ely Deldig.
Sa dili pa ang kompetisyon, adunay zumbathon nga pagahimuon ug libre kini sa tanan.
Ang dance marathon nga sugdan sa ala-1 sa hapon, pagadumalaon sa mga lisensiyadong Zumba instructors nga sila si Marco Brigoli, Dario Tagalog ug Fernando Ungria. (BANAT NEWS)
- Latest
- Trending
