6th doce pares world eskrima gitakda

CEBU, Philippines - Gibana-banang moabot ngadto sa 150 ka eskrimador gikan sa walo ka nasud lakip na ang host Philippines ang mosalmot sa ipahigayong Cacoy Doce Pares World Federation International Martial Arts Seminar and Workshop and Eskrima Championships sa Hunyo 6-10 diha sa City Sports Club-Cebu sa Cebu Business Park.

Gawas sa Pilipinas, ang mga eskrimador gikan sa Australia, Canada, Indonesia, Mexico, New Zealand, United Kingdom ug United States ang mosalmot sab ning usa ka dakung kalihukan sa eskrima nga gitawag og "The Grand Gathering 2012."

Kapin sa 40 ka indibidwal ang pasidunggan atol sa 3rd Doce Pares Hall of Fame ceremony.

Nakuha isip partner sa Doce Pares ang inilang radio station nga dySS Super Radio ug ingon man sab ang dyRT FM.

Agi'g pagtimaan sa ilang partnership, si dySS station manager Susan Aliño ug Doce Pares Supreme Grand Master Ciriaco 'Cacoy' Cañete nagpirmahanay sa MOA atol sa tigum niadtong Miyerkules sa gabii didto sa Ruby Room 2 sa Golden Prince Hotel and Suites sa Archbishop Reyes Avenue.

"This is our own little way of helping the Filipino martial arts as we want to help bring back the heritage and culture of the Filipinos," matud pa ni Aliño.

Sa iyang bahin, si Cañete mipahungaw sa iyang dakung kalipay tungod sa pagsuporta sa dySS.

Ang umaabot nga world seminar ug championships maoy ikaunom alang sa Doce Pares ug ikatulong higayon nga ipahigayon dinhi sa Sugbu. Ang unang   torneyo didto gipahigayon sa United States ug ang ikaduha didto sa Jakarta, Indonesia.

Mopaluyo sa maong kalihukan mao ang Golden Prince, Golden Valley Hotel ug Web Express Hotel.  (BANAT SPORTS)