Green, Pink nagtabla

CEBU, Philippines - Magbinuk-anay sa ilang baraha ang Green ug Pink teams karong gabii sa pagpadayon sa Phase 3 Camella Homes Sunday Club basketball tournament didto sa Villas Magallanes gym, Lapu-Lapu City.

Kasamtangang nagtabla ang duha sa managsamang 2-1 win-loss records human ang Green team nakabawos pinaagi sa paglubong sa Pink, 98-83 ug mabuak kini human sa ilang duwa karong gabii.

Mipahungaw dayon sa ilang kainit ang Green luyo sa mainitong opensa nilang Andrino ug Jimboy Igot aron moposte og 17 puntos nga bentaha paghuman sa first period.

Si Andrino mitikdol og 32 puntos aron pangulohan ang Green, samtang si Igot mitimbre og 24 puntos. Sila si Allan Sepe ug Geraldez mitimang og 11 puntos matag usa alang sa maong kadaugan.

Ang naparot nga Pink gipangulohan ni Ondo Casquejo pinaagi sa iyang 39 puntos, gisundan ni Clied Malolot nga adunay 21 puntos, Edwin Amista nga milansang og 16 puntos ug Centes Brañanola nga mihirit og 11 puntos.

Sa lain pang mga duwa, ang Sutike Yama Resto Bar midaog sab batok sa Ryle Trucking, 68-63 ug ang Rollway Customs Brokerage mipukan sa R.M.A. sa iskor nga 64-55 sa Inter-company division.

PUNTOS MATAG USA

GREEN (98) - Andrino 31, Igot 24, Ragaza 12, Sepe 11, Geraldez 11, Cortes 4, Diongzon 2, Aparente 2, Modena 2

PINK (83) - Casquejo 39, Malolot 21, Amistad 16, Brañanola 11, Vega 3, Pleños 2, Almacen 1 (BANAT SPORTS)