Padayon ang aksiyon sa partner's cup

CEBU, Philippines - Aduna lamang lima ka koponan ang mosalmot sa 6th CESAFI Partner's Cup nga sugdan karong Domingo diha sa Cebu Coliseum.

Ang defending champion University of the Visayas (UV) Green Lancers, kinsa mosul-ob og jersey sa ilang corporate-backer Prime Asia Lending, maoy mangulo sa mga entrante nga naglakip sa Lion Tiger Katol/University of San Jose-Recoletos (USJ-R) Jaguars, Gaisano Capital Tisa-University of Cebu (UC) Webmasters, San Marino Corned Tuna-University of Southern Philippines Foundation (USPF) Panthers ug KIA Motors/Cebu Institute of Technology-University (CIT-U) Wildcats.

Wala mosalmot ang Southwestern University (SWU) Cobras ug ang University of San Carlos (USC) Warriors kay kuwang og players.

Ang kalihukan gilusad ni CESAFI commissioner Felix 'Boy' Tiukinhoy Jr. kagahapon atol sa senemanang SCOOP Forum ni Bobby Inoferio kagahapon didto sa Baseline Restaurant.

Si Tiukinhoy giubanan nilang UC team manager Atty. Baldomero C. Estenzo ug mga   representante sa corporate sponsors sa liga sama sa Lyndon Angan sa RCTV Sports ug Skycable, nga maoy mokober sa mga duwa gikan sa semis hangtod sa "best-of-five" finals,   Arnel Lupain sa San Marino Corned Tuna, CIT-U athletic director Alex de la Torre sa ngan sa Kia Motors ug UC coach Roel Gomez.

Ang torneyo mosubay og double round robin format diin ang top qualifier makaangkon og luna sa semifinal round. Ang nahabiling upat moduwa og laing single round robin aron pagdeterminar sa puwesto diin usa lang sa lima ka entrante ang matagak.

Ang modaog maoy magsangka sa kampiyonato.  (BANAT SPORTS)