Si Earl Lorenz Managbanag, basketball star ugma damlag?

CEBU, Philippines - Nakahigayon ako'g pakighinabi sa labing unang higayon kang Konsehal Edwil Managbanag sa barangay Mambaling kinsang pamilya maoy tag-iya sa Noly-Annie store nga namaligya ug lamiang lechon dapit sa karaang fronton sa Jai-Alai sa C.Padilla street nga sakop sab sa Mambaling tungod kay ako siyang na-atlan nga nagdumala sa asphalting project sa Alaska, Mambaling nga gikalipay kaayo sa mga molupyo ilabi na gyud sa mga magtutudlo sa Alaska Elementary School ug mga traysikad drivers nga taud-taud na kaayong nag-antos sa libaongon ug lapokon nga kalsada.

Samtang nagsige og yabo ang dumptruck ug aspalto ug gisundan ug bantok sa pison, dugay-dugay namong estoryahay ni Kon. Edwil daplin sa kalsada nga karon pwerte nang nindota agian ug dili na lapok ang dalan bisan kung mag-uwan. Ang maong proyekto gikatakdang matapos sulod sa tulo ka semana ug entiro Alaska na unya ang makapahimulos sa maanindot nga dalan nga angay nang ikapasigarbo sa atong mga political leaders.

Sa among paghinabi, mitug-an kanako si Kon. Edwil nga ang iyang 11-anyos nga anak lalaki si Earl Lorenz nga anaa sa ikalimang ang-ang sa elementarya karong abli sa klase sa Hunyo, usa diay ka sakop sa University of San Carlos-North Campus basketball team nga maoy kampiyon sa Milo-BEST sa miaging tuig dihang ilang gipukan ang ilang sister team USC-South Campus.

Niadtong 2010, dihang nagtungha pa sa Grade 3 si Earl Lorenz kinsa maoy point guard sa team, maoy top scorer dihang sila maoy nahimong kampiyon sa Cebu Youth Basketball League (CYBL) diin ilang gipilde ang Cebu Eastern College ug sa mao gihapong tuig, sila maoy kampiyon sa Milo-Age Group diin ilang gipilde ang Springdale.

Niadtong 2009 dihang nagtungtong pa siya sa Grade 2 unang mipakita sa iyang abilidad sa basketball si Earl Lorenz diin igo lang silang nahimutang isip 3rd runner-up sa torneyo sa Milo apan daan nang nakita ni coach Galimar Largo ang iyang potential.

Matod pa ni Kon. Edwil, nakurat sab siya sa gipakita sa iyang anak sa natad sa basketball ug iyang hipanglantawan nga dunay ugma ang iyang anak tungod kay disiplinado siya nga bata.

Mi-asoy si Kon. Edwil nga sa wala pa mahatagi og break sa basketball si Earl Lorenz, nalakip na unta siya sa USC-North soccer team apan inay mahimong football player, didto siya molandig sa basketball. Gawas sa basketball, daghan sab og nakat-onan si Earl Lorenz nga laing natad sa sports tungod kay usa siya ka yellow belter sa tae-kwon do, 2nd dan sa karatedo ug maantigo sab sa tennis.

Sa kasamtangan hingpit nga suporta ang gihatag sa magtiayong Managbanag---Kon. Edwil ug sa iyang asawa nga si Rosemarie ngadto kang Earl Lorenz sa iyang napiling natad sa sports nga mao ang basketball.

Si Kon. Edwil usa ka barrister nga gradwado sa UV Gullas Law School niadtong tuig 2000 samtang ang iyang asawa usa ka government employee nga nadestino sa City Health Department.

Unang misalmot sa bugnong lugaynon si Kon. Edwil niadtong 2002 ug anaa na siya karon sa iyang ikatulo ug kataposang termino sa pagka konsehal ug ang pwesto isip barangay kapitan maoy iyang nahuna-hunaan nga iyang suwayan sa sunod barangay elections.

Matod pa niya nga napugos siya'g apil sa politika tungod kay iyang nakita ang mga problema sa barangay nga angayan hatagan og kasulbaran tungoid kay sakop man siya sa barangay Lupon g Tagapayapa niadtong 2001 ug didto niya matugkad nga angayan siyang moserbisyo sa katawhan sa Mambaling.

Siya karon maoy chairman sa committee on Health and Peace & Order sa barangay.

MISCELLANEOUS. Congrats to the newly-elected Board of Directors (BOD) of the Cebu News Workers Multi-Purpose Cooperative (NEWSCOOP) during its 15th General Assembly at the Marcelo B. Fernan Press Center (CENEWOF Theatre) in Sudlon, Lahug. They are Marlinda Angbetic Tan, Elias O. Baquero, Gregg Rubio, Liv Campo, Luz Cuyos, Fred Languido and yours truly who landed at the fourth spot. - (BANAT NEWS)