Players sa Sugbu andam na's15th Nestea beach volley finals

CEBU, Philippines - Andam na ang mga representante sa Sugbu alang sa gikahinaman nga 15th Nestea Beach Volley National Finals nga gikatakda sa Abril 19-21 didto sa Crystal Sand Resort sa Boracay Island.

Sila si Jade Becalco ug Mike Abria sa University of the Visayas (UV) ug Jason Uy ug Jade Illut sa University of San Jose-Recoletos (USJ-R) maoy mangu sa kampanya sa Sugbu sa men's division, samtang ang tandem nilang Danika Yolanda Gendrauli ug Lorie May Layno sa Southwestern University (SWU) mao sab ang mangulo sa habig sa women's division.

Bisan pa sa ilang kapildihan ngadto sa defending national champion Jovelyn Gonzaga ug Fiola Mae Ceballos sa Central Philippines University (CPU) sa Iloilo atol sa Visayas leg sa miaging bulan didto sa HK Resort sa Moalboal, si SWU coach Jason Gabales mipadayag sa iyang pagsalig sa ilang kahigayonan nga molangkat sa korona sa women's division nga nahanaw sa ilang mga kamot upat ka tuig na ang nilabay.

Sa iyang bahin, si Gendrauli, miingon nga bugtong nilang tumong mao ang pagdaog sa national championship aron makuha pagbalik ang madaugong mga adlaw sa SWU isip powerhouse squad sa beach volley.

Gawas sa SWU, UV, USJ-R ug CPU, lain pang Visayas contenders naglakip nilang Sheryl June Denila, Patty Jane Orendain, Roelene Inaudito ug Kerwin Reje nga pulos gikan sa University of St. La Salle (USLS)-Bacolod.

Gawas sa mga tropeyo ug medalya, ang grand winner sa matag dibisyon mobulsa og P100,000 matag usa. Ang second placer makadawat og P65,000, samtang ang third ug fourth makaangkon og P25,000 ug P22,500 matag usa. (BANAT SPORTS)