Mistica kampeon sa Canadian Open 8-Ball
MANILA, Philippines - Pinagharian ni Filipino Ramon “Maestro Monching” Mistica ang 2012 Canadian Open 8-Ball Championships kamakailan sa Calgary, Alberta, Canada.
Tinalo ni Mistica si Canadian Nick Kruger sa finals, 6-3, upang ibulsa ang $2,250 total prize money.
Tinanggap naman ni Kruger ang runner-up purse na $1,500, habang ang Filipino entry na si Edwin Montal ay may $900 bilang third-placer.
“Finally, I made it. It has been my dream for quite sometime now to win a championship in an international tournament,” sabi ng pambato ng Murphy, Quezon City na binigo si Filipino pool legend Jose “Amang” Parica noong 1980’s.
Naunang pinayukod ni Mistica si Russ Whittle, 6-1, sa semifinals para itakda ang kanilang titular showdown ni Kruger, isang 6-2 winner kay Montal.
Nauna dito, iginupo ni Mistica sina Jonathan dela Cruz, 6-3, Joe Pence, 6-4, at Cory Livermore 6-4, patungo sa Final Four.
- Latest
- Trending
