Brgys. Opao, Guizo naghari sa chess event

CEBU, Philippines - Ang barangay Opao ug Guizo maoy naghari sa chess event sa 5th Mayor's Cup Sports Festival niadtong weekend didto sa Mandaue City Cultural and Sports Complex.

Luyo sa mga paningkamot nilang Bon Tibob, Redemptor Nailon ug Ruben Ngujo, ang Opao mihakot og 16 puntos aron langkaton ang titulo sa Inter-barangay open category uban ang P10,000 nga ganting salapi.

Ang Pagsabungan nga gibitoonan nilang Ramsey Pedrosa, Renaldo Flores ug Diego Claro, miangkon sa ikaduhang dapit sa ilang 14 puntos, samtang ang Subangdaku sa managsuong Torres nga sila si Silverstein, King James ug Guillermo, mi-okupar sa ikatulo nga dapit sa ilang 10 puntos.

Ang Paknaan nga gimaneho nilang Eden Diano ug managsuong Samuel ug Julito Tenio mikapyot sa ikaupat nga dapit.

Ang Pagsabungan mibulsa og P7,000 samtang ang Subangdaku ug Paknaan nakadawat og P4,000 ug P2,000 matag usa.

Sa laing bahin, ang Guizo, maoy nanghawod sa Inter-youth division sa ilang otso puntos luyo sa mga paningkamot sa managsuong Claro nga sila si Diego ug Jethro uban ni Dwight Bentulan.

Ang Paknaan-B miposte og siyete aron mopahiluna sa ikaduha, samtang ang Subangdaku ug Paknaan-A mi-okupar sa ikatulo ug ikaupat.

Gipasiugdahan sa Mandaue City Sports Commission (MCSC), ang duha ka bulan nga sportsfest, usa lamang sa mga kalihukan sa tinuig nga kapistahan sa ilang mahal nga patron St. Joseph karong Mayo 7-8.  (BANAT SPORTS)