Salido Via TKO, Pinoy boxers Concepcion, Tanada pilde

CEBU, Philippines - Gipamatud-an ni WBO featherweight champion Orlando Salido nga dili taghap ang iyang unang daog batok ni Puerto Rican Juan Manuel Lopez, dihang giusban niya kini sa ilang rematch kagahapon didto sa San Juan , Puerto Rico.

Ang beteranong Mehikano mipaundang ni Lopez sa round 10 sa usa ka kulbahinam ug brutal nga sangka.

Ang maong away maisip nga usa sa kandidato isip ‘Fight of the Year’ dihang isug nga nagbinombahay og kumo ang duha ka boksidor diin unang natumba sa round 5 si Salido human maigo sa hook ni Lopez.

Bisan pag pulos nanghubag ang ilang nawung, wala gihapon makabsi sa hangin ang duha ka boksidor ug padayun silang nagbinukbukay hangtod nga miabot ang round 10 diin usa ka naghaguros nga uppercut ang gibuhian ni Salido aron mapatumba si Lopez.

Nakabarug pa si Lopez human mahayang, apan giundang gihapon sa referee ang away human makita nga naglisud na pagrekober ang boksidor.

Sa supporting bout, pakyas ang two-time Pinoy world title challenger Bernabe Concepcion pagsakmit sa daog dihang gipasurender siya ni undefeated Mexican Mickey Garcia sa seventh round alang sa NABO featherweight title.

Nasugamak usab ang laing Pinoy boxer nga si Allan Tanada human siya gilupig ni Gamalier Rodriguez sa Puerto Rico pinaagi sa unanimous decision. LPM gikan sa boxingscene.com