2nd Word Special Games buksan na

CEBU, Philippines - Mag-abot na ang dul-an sa 600 ka special athletes sa pagbukas sa 2nd Word Special Games karong alas-8 sa buntag didto sa Aznar Coliseum.

Ang mga partisipante naggikan sa mga siyudad sa Mandaue, Toledo, Carcar ug Naga, ingon man gikan sa lungsod sa Minglanilla, Consolacion ug Liloan.

Ang mga bisitang atleta gikan sa Negros ug Bohol ang mopakita sab og aksiyon ning talagsaon nga kompetisyon nga gipasiugdahan sa Word Center For Special Children-Asia   sa abag sa Handuraw Pizza ug AMA Computer College-Mabolo Campus.

Matud pa ni event founder Al Salomon, nga sa miaging tuig, kadto lamang mga tawo nga adunay autism, down syndrome ug mentally challenged ang gitugotan nga moduwa sa miaging tuig. Apan ning higayona, ila na nga gilakip kadtong adunay cerebral palsy, wheel-chaired, dwarfism ug visually ug hearing impaired.

Mga events nga tigian naglakip sa athletics, arnis, badminton, basketball, bowling, boxing, chess, handball, hockey, scrabble, soccer, swimming, table tennis, volleyball ug wall climbing.   Himuon sab ang locomotor ug non-locomotor activities.

Gawas nga maoy binyu sa opening ceremony, ang Aznar Coliseum mao sab ang host sa basketball ug volleyball events.

Ang lain pang mga binyu naglakip sa Handuraw alang sa chess ug scrabble, Cebu Technological University (CTU) sa athletics, Gaisano Bowlingplex sa bowling, Cebu City Sports Center sa arnis ug boxing, Emmanuel Bible College gym sa developmental skills, hockey ug handball ug St. Michael Village sa Banawa alang sa wall climbing. (BANAT SPORTS)