Bhutakalz daog vs. Pecandela sa IBP

CEBU, Philippines - Mikulit sa ilang ikatulong sagunson nga daog ang Bhutakalz human ilang gilatos ang undermanned Pecandela Law Firm sa iskor, 78-56 kaniadtong Sabado aron sakmiton ang solong liderato sa nagpadayong elimination round sa 8th Season IBP-2012 First Conference basketball tournament didto sa Capitol Parish gym sa dan Escario, ning dakbayan.

Migamit og 29-11 rally ang Bhutakalz didto sa fourth quarter aron moposte sa ilang labing dakung labaw, 58-42. Igo lang silang naglabaw og usa ka palito, 15-14 sa opening period ug nailog sa Pecandela ang liderato atol sa halftime, 31-29 pinaagi sa mga puntos gikan nilang Jessie Capoy, Sam Malazarte ug Mark Russ Gamallo.

Hinoon didto sa fourth period, wala kapugngi ang pagmangtas nilang Van Ligutan ug Dwight Remedio kinsa maoy nangu sa opensa aron sila modaug og 22 puntos.

Miposa og 18 puntos si Ligutan samtang parehong midugang og 14 puntos silang Resty Arnaiz ug Remedio.

Si Capoy maoy nangu sa Pecandela sa iyang 17 puntos ug magkumboya silang Malazarte ug Gamallo ug 27 puntos.

Sa sayo pa, mikulit sa primero nilang daog ang Dissenters dihang nakaipsot sila batok sa Primos-Rama, 55-53 aron magtabla ngadto sa 1-2 nga baraha.

Ang nagpungasi nga puntos gikan ni Michael Sarno didto sa fourth period maoy yawe sa ilang kadaugan dihang mipabuhagay siya'g sagunson 10 puntos lakip ang usa ka krusyal nga lay-up nga maoy nakaduslit s mainitong rally apan si Stephen Olingay mao nangu sa opensa sa iyang 17 puntos.

Sila si Mat Velez ug Al Limalima maoy nangu sa Primos-Rama sa parehong 11 puntos.

Sa laing duwa, midaug ang Los Demonyous ni Bads Del Prado batok sa Jodin ni Allan Geotina, 92-69 lang sa ilang ikaduhang daog sulod sa tulo ka duwa samtang ang Jodin adunay 1-2 nga baraha.

Silang Ferdie Riveral ug Jun Pintor maoy nangu sa Demonyous sa ilang 20 ug 16 puntos, matag usa ug ang pilderong Jodin gipangulohan nilang John Ungab ug Gilbert Arrabis kinsa mihimo'g 15 ug 14 puntos matag usa.  - BANAT NEWS