Green nakabangon sa Sunday Club
CEBU, Philippines - Nabinlan pa og buynas ang Green team dihang nakabangon kini sa final period aron sikaran ang Pink team, 102-100 sa Phase 3 Camella Homes Sunday Club basketball tournament 2012 didto sa Villas Magallanes gym sa Lapu-Lapu City.
Unang mipahungaw og mga puntos ang Pink sa nag-unang duha ka kuwarter hinungdan nga nakabentaha sila og sayes puntos sa halftime, 55-46.
Apan ang nagluya nga Green team kalit nga milagsik sa third period sa giya nilang Alan Sepe ug Dodong Aparente, mikalingaw og kitkit sa labaw hangtod nailog nila ang bentaha paghuman sa maong kuwarter, 71-64.
Nahimong kulbahinam ang duwa dihang nagtabla ang iskor, 100-all human sa duha ka sunod-sunod nga baskets ni Rolly dela Pieza sa nanghinapos nga bahin sa final period. Apan si Roilan Sumilang nakakubit og foul nga maoy naghatod kaniya ngadto sa free-throw line ug ang iyang duha ka free throws maoy mikandado sa ilang kadaugan.
PUNTOS MATAG USA
GREEN (102) - Sepe 29, Aparente 17, Ragaza 14, Sumilang 13, Modena 12, Andrino 10, Balberona 6, Geraldez 6, Diongzon 4, Cortes 2
PINK (100) - Dela Pieza 27, Bondal 16, Villanel 14, Pleños 12, Almacen 9, Vega 7, Brañanola 6, Caro 6 (BANAT SPORTS)
- Latest
- Trending
