CEBU, Philippines - Usa ka pro-am title fight nga uloha'g "Gub-anay sa Dagway" ipahigayon karong Domingo didto sa Brgy. Basak gym, Lapu-Lapu City.
Mobida sa boxing card mao si Adones 'TI Yamagata' Aguelo sa TI Gym sa Mandaue City nga modepensa sa iyang Philippine Boxing Federation featherweight title batok sa beteranong si Renan Branzuela sa Bukidnon.
Mao kini ang unang pagdepensa ni Aguelo sa iyang korona dihang midaog kini pinaagi sa TKO batok ni Jake Verano niadtong Septiyembre sa miaging tuig.
Si Roemart "TI Yamagata" Sentillas makigsangka batok kang Romnick Magos alang sa 10 rounds, si Mashasi Tada sa Japan makigtakos batok ni Junior Salvador alang sa 6-rounder preliminary.
Dili sab palupig ang GMA 7’s Buhay Boksingero champions nga sila si Gerpaul “TI Yamagata” Valero ug Rajah Renoel Pael sa Matalom, Leyte gikatakda nga mopakita sab sa ilang katakos batok sa nagkalain-laing karibal sa undercards. Si Ardie "TI Yamagata" Boyose makigsangka ni Jovan Muñoz sa gikatakda nilang upat ka hugna. (BANAT SPORTS)