RoRo Transport, 2-0 na's LLBA-Radaza Cup

CEBU, Philippines - Padayon nga mihakot og daog ang RoRo Transport, ning higayona batok sa Rollway Customs Brokerage, 75-69 sa nagkainit nga aksiyon sa LLBA Radaza Cup 2012 basketball tournament didto sa Villas Magallanes gym, Lapu-Lapu City.

Ang RoRo Transport ni team owner Roilan Sumilang milabaw og siyete puntos sa third period, 52-45, apan mikolapso kini dihang ang Rollway Customs Brokerage mipahungaw sa ilang kainit sa final period aron panipsan ang labaw.

Hinuon, nabaraw ang nag-aginod nga duwa sa RoRo Transport dihang migana og balik ang opensiba nilang RJ Cordero ug Raymund Castaño nga maoy responsable sa ilang kadaugan.

Si Cordero mikimada og 18 puntos aron pangulohan ang RoRo Transport, samtang si Castaño miratsada og 12 puntos. Sila si Titing de Jesus ug Sumayang Rukawa miariya og 10 puntos matag usa sa RoRo Transport nga nimaneobra na og 2-0 nga baraha.

Ang pilderong Rollway Customs Brokerage nga wala pa makatilaw og daog sa duha nila ka duwa gipangulohan sab ni Centes Brañanola, kinsa milansang og 19 puntos, gisundan ni Waylmer Rosal sa iyang 14 puntos.

Wala sab magpa-alkanse ang team owner nga si Rolly dela Pieza, kinsa miposa og 12 puntos, samtang si Ondo Casquejo mitikdol og 11 puntos.

Sa pasiunang duwa, ang Lheo Autoshop ni team owner Leo Almacen nakatagamtam na gyud og daog sud sa tulo ka duwa dihang ilang gipilde ang Rulls Bakeshop ni team owner Rupert Cañizar, 76-74.

Miantog og 24 puntos si Rene Cuadra aron pangulohan ang Lheo Autoshop, samtang gidebuynas sab si Alegre dihang miiskor kini og 24 puntos alang sa pilderong Rulls Bakeshop nga nagbitbit og 1-2 nga baraha.

Natukod ang maong torneyo pinaagi sa mga paningkamot sa mga lig-ong haligi sa LLBA nga sila si Alan Yu nga maoy presidente ug Dr. Michael Ouano isip bise presidente.

Gipaluyohan sab kini ni Lapu-Lapu City councilor Harry Radaza, Rollway dela Pieza ug sa JB Sportswear.

Puntos Matag Usa

Unang duwa:

LHEO AUTOSHOP (76) - Cuadra 24, Baring 12, Ragaza 11, Hesalta 8, Asuncion 7, Almacen 6, Balberona 6, Amodia 2

RULLS BAKESHOP (74) - Alegre 24, Ompad 13, Sepe 10, Intong 9, Myrtyle 7, Romero 7, Gallarte 4

Ikaduhang duwa:

RORO TRANSPORT (75) - Cordero 19, Castaño 12, Rukawa 10, De Jesus 10, Taghoy 9, Aying 6, Aparente 4, Sumilang 4, Aballe 2

ROLLWAY (69) - Brañanola 19, Rosal 14, Dela Pieza 12, Casquejo 11, Sevilla 6, Daguflo 5, Shalala 2 (BANAT NEWS)