Roro Transport miratsada sa LLBA Radaza Cup 2012

CEBU, Philippines - Miratsada dayon ang Roro Transport ni team manager Roilan Sumilang aron mohakot og daog batok sa Solmeat, 79-66 sa pagsugod sa LLBA Radaza Cup 2012 basketball tournament niadtong Miyerkules didto sa Villas Magallanes gym sa Lapu-Lapu City.

Bugnaw pa ang Roro pagsugod sa duwa ug gani gibiyaan kini og siyete puntos paghuman sa unang 10 minutos sa duwa, 9-16.

Nausab ang tiempo sa duwa sa second quarter dihang kalit lang nga miarangkada ang Roro Transport, kinsa mipauwan og mga puntos aron tapuson ang halftime, 32-26.

Upat ka players ang mikadlit og double figures alang sa Roro Transport ni playing coach Dodong Aparente, nga wala na mobati'g kaluoy ngadto sa Solmeat     hangtod nga nahuman ang duwa.

Si Castaño maoy nangulo sa Roro Transport pinaagi sa iyang 20 puntos, samtang ang pilderong Solmeat ni team manager Leo Bascon gipangulohan sab ni Rene Daño, kinsa mipupo og 23 puntos.

Sa pasiunang duwa, ang team Corporation ni team owner Roger Ompad mikulit sab sa una nilang daog human ilang gipilde ang Royale Asia ni team manager Philip Lorena sa iskor nga 77-73.

Si Pompy Ngujo maoy topscorer sa Corporation sa iyang 23 puntos, samtang si Campilan maoy nangu sa pilderong Royale Asia.

Ang LLBA Radaza Cup 2012 gipaluyohan sab ni Lapu-Lapu City councilor Harry Radaza, Rolly dela Pieza, Alan Yu ug Dr. Michael Ouano.

PUNTOS MATAG USA

Unang duwa:

CORPORATION (77) - Ngujo 23, Sumalinog 14, Olivar 13, Bensi 10, Orboc 7, Ompad 6, Alsabo 4

ROYALE ASIA (73) - Campilan 27, Alian 8, Dungon 8, Pinote 8, Reyes 6, Alpuerto 4, Lorena 2

Ikaduhang duwa:

RORO TRANSPORT (79) - Castaño 20, Taghoy 17, Rukawa 17, Cordero 12, Aballe 8, Aparente 5, De Jesus 5, Sumilang 4, Aying 1

SOLMEAT (66) - Daño 23, Lazaraga 16, Tampus 10, Pedrano 2, Labadan 2, Paquibot 2, Barangan 2, Bascon 2, Adlit 2  (BANAT SPORTS)