AJY Bong, Lady of the Rule gilihia'g daog

CEBU, Philippines - Gilihian og daog ang Lady of the Rule ni team manager Dr. Michael Ouano human makaipsot batok sa Rulls Home Bakeshop, 75-74 pagsugod sa Lapu-Lapu Basketball Association (LLBA) Radaza Cup 2012 niadtong Domingo didto sa Villas Magallanes gym sa Lapu-Lapu City.

Ang tira ni Garry Diaz sa katapusang 24 segundo maoy nakaluwas sa Lady of the Rule, kinsa nakabentaha og 10 puntos sa halftime, 38-28.

Nakapanimaho na unta og daog ang Rulls Bakeshop ni team owner Rupert Cañizar dihang naglabaw kini og uno punto sa daginutong segundos, 74-73, apan sa wala damha, si Diaz mibuhi sa iyang mahinungdanong itsa nga nakapahimo niyang bayani sa kadaugan. Hinuon si Emage maoy topscorer sa Lady of the Rule sa iyang 19 puntos, samtang si Diaz adunay 14 puntos.

Si Ryan Ceniza mikutlo sab og double figures alang sa Lady of the Rule pinaagi sa iyang 10 puntos.

Ang Rulls Bakeshop nga pirme mabitay inig human sa matag kuwarter, gipangulohan ni Alan Sepe, kinsa mihaon og 28 puntos.

Sa opening game, gisugat sab og daog ang AJY Bong ni team manager Allan Yu pinaagi sa pagdemolis sa KAI gasoline station (Aries Lending kaniadto) sa iskor nga 103-90.

Kontrolado sa AJY Bong ang duwa gikan sa pagsugod hangtod na sa paghuman diin lima sa ilang players ang mikadlit og double figures pinangulohan ni Allan Yu, kinsa miugkat og 25 puntos, gisundan ni Jack Soler nga miligwat og 16 puntos. Sila si Ondo Cadungog ug Celso Igot parehong mitikdol og 14 puntos, samtang si Lapu-Lapu city councilor Harry Radaza mitimang og 10 puntos.

Si Lito Magat, kinsa mitubil og 20 puntos maoy nangu sa KAI gasoline ni team manager Tito Francisco.

Ang LLBA Cup 2012 nga gipadagan ni Billy Nadado uban sa adviser niining si Archie Ompad, gipaluyohan sab ni Hon. Harry Radaza ug Rolly dela Pieza.

PUNTOS MATAG USA

Unang duwa:

AJY BONG (103) - Yu 25, Soler 16, Cadungog 14, Igot 14, Radaza 10, Soroño 8, Ochea 7, Flores 6, Gemena 2

KAI GASOLINE STATION (90) - Magat 20, Tojeno 18, Hiyas 15, Daño 13, Genson 6, Gutib 6, Amodia 5, Francisco 4, Limpangog 2

Ikaduhang duwa:

LADY OF THE RULE (75) - Emage 19, Diaz 14, Ceniza 10, Sese 9, Manilag 8, Bontes 8, Bardago 6

RULLS BAKESHOP (74) - Sepe 28, Alegre 15, Decembrano 8, Galarte 6, Galvez 6, Myrtle 5, Ompad 4, Romero 4 (BANAT SPORTS)