CEBU, Philippines - Mikabkab dayon og bulawang medalya ang Team Cebu City (TCC) bisan og wala pa opisyal sugdi ang mga sangka sa 2012 PLDT-ABAP Amateur Boxing Championships kagahapon didto sa Dumaguete City.
Ang TCC otomatik nga nakakuha og usa ka gold medal sa 54 kgs. class sa junior division kay walay entranteng boksidor ang miapil sa maong timbang.
Tungod niini ang 14-anyos nga si Jerry Castroverde segurado na makakuha og luna sa National finals sunod buwan didto sa Tagbilaran City.
Si Castroverde usa lang sa duha ka TCC boxers nga miapil sa juniors division. Ang iyang teammate nga si Junrel Jimenez kinahanglan pa usab nga modaog aron moabante sa semifinals batok sa boksidor gikan sa Bago City.
Sa laing bahin, ang Team Mandaue nakakuha og bronze medals kortesiya ni Eleno Traya sa 60 kgs. class.
Hinuon, pipila ka boksidor sa Mandaue ang kinahanglang hulipan kay lapas na sa edad.
Lakip sa gitangtang mao sila si Dann Lou Codilla, Ferde San Roque ug Welmark Dignos. Mipuli kanila mao sila si Traya, Polid Banal ug Bryan Remedio.
Gawas sa TCC ug Team Mandaue, laing Visayas team nga misalmot mao ang ABANO A ug B, Bago, Tanuan, Leyte, Samar ug Negros Occidental. (BANAT SPORTS)