Denver Nuggets daog sa 2 o.t

CEBU, Philippines - Mi-aslom ang reunion tali sa Denver Nuggets ug ni Carmelo Anthony dihang naka-ipsot ang Nuggets batok sa New York Knicks, 119-114 pinaagi sa double overtime atol sa labing una nilang panagbagat sukad gihimo ang trade tali kanilang Danilo Gallinari ug Anthony atol sa nagpadayong duwa sa NBA regular season didto sa Madison Square Garden sa New York City.

Gilupig ni Gallinari si Anthony sa puntos atol sa maong sangka tungod kay si Gallinari mihimo'g career-high 37 puntos aron pangulohan ang Nuggets.

Laing kanhi Knicks nga si Al Harrington mi-iskor og 22 sa iyang 24 puntos didto sa second half alang sa Nuggets ug siya maoy nagpugong kang Anthony sa dihang mosuway na unta pag-rally ang Knicks.

Miburak og 25 puntos si Anthony alang sa Knicks. Milangkat sab siya'g 10 ka rebounds apan misipyat sab siya'g 20 sa iyang 30 ka tirada ug gi-boohan siya sa mga fans.

Miduwa si Anthony uban sa Nuggets sa una niyang pito ug tunga sa tuig sa iyang career sa wala pa siya tugoti nga magpa-trade.

Diriyot unta mahimong bayani si Anthony dihang mi-iskor siya'g sagunson kuatro puntos ug siya sab ang nakatabla sa iskor, 98-all may 1.7 ang nahibilin sa regulation.

Ang iyang three-pointer sa 2:33 ang oras sa first overtime, maoy nagbugto sa 100-all tie ug siya sab ang mihatag og labaw sa Knicks sa kataposang 1:02 sa duwa.

Gitabla kini pag-usab ni Hilario Nene pinaagi sa iyang duha ka free throws gikan sa foul ni Anthony.

Nabuhian ni Anthony ang bola may 0.3 segundo hinungdan sa laing overtime.

Naglabaw ang Knicks pinaagi sa jumpshot ni Anthony, 111-110 may 1:38 ang nahibilin sa second overtime apan naka-iskor og duha ka puntos gikan sa free throws si Gallinari ug nakapasulod og three-pointer si Harrington aron mabawi sa Nuggets ang abante, 115-111 may 46 segundos ang nahibiling oras.

Mibahug og 12 puntos ug may 13 ka rebounds si Nene alang sa Nuggets kinsa nagduwa nga wala ang ilang starting guard nga si Arron Afflalo tungod sa groin injury.

Si Andre Miller maoy nipuli kang Afflalo ug miamot siya'g 14 puntos ug mihimo'g 12 ka assists alang sa Denver kinsa nakadaug na og upat ka sagunson nga duwa ug aduna nay 7-0 nga baraha batok sa mga teams gikan sa Eastern Conference.

Nahasol karon si Anthony sa hubag sa iyang walang pulso nga iyang gipamati kapin na sa semana nga maoy nakapausab sa iyang shooting. Naglagot sab siya dihang na-ejected siya kanoadtong Biyernes dihang napilde sila batok sa Milwaukee ug gi-boohan sab gihapon sa second half.

Sa laing duwa, parehong nakaipsot ang Detroit ug ang Houston og tres puntos nga kadaugan batok sa ilang tagsa-tagsa ka kaatbang. Ang Pistons midaug batok sa Portland, 94-91 ug midaug sab ang Rockets, 105-102 batok sa San Antonio.

Gilubong sa Atlanta ang Cleveland, 121-94, midaug ang Chicago batok sa Charlotte, 95-89, gipukan sa Memphis Ang Sacramento, 128-95, nakaeskapo ang Dallas batok sa New Orleans, 83-81, midaug ang Miami batok sa Philadelphia,113-92, midaug ang Oklahoma City batok New Jersey, 84-74 ug gibihag sa Utah ang Minnesota, 108-98. NBA.com (- BANAT NEWS)